趙彤或嫁富商八月閃婚
來港發展八年的台妹趙彤（Yedda），初出道時是「翻版孫燕姿」，來港發展後一度是「晶女郎」，最廣為人識的身份是霍啟剛、林忠豪、鄭裕彤孫鄭志恒等「富後代」緋聞女友，多重身份背後，傳八月將與內地富商閃婚的她，需要一個身份認「彤」。
曾與多位「富後代」傳緋聞的趙彤，對於被指因為想跟霍啟剛鬥氣，才急於在八月結婚，她說：「我會祝福佢哋（霍啟剛、郭晶晶）早生貴子，永浴愛河！」但冇人會用一生幸福嚟賭氣。她亦指曾有追求者問：「你咁靚，點解仲未結婚？」令佢唔知好嬲定好笑。
她指自己一向唔排除閃婚：「因為依家靠得住又想結婚嘅男人少之又少，我的確喺度考慮緊應唔應承好。（會嫁內地富商？）感情最重要講feel，我雖然已經係盛女，但搵另一半冇得急，揀老公同揀男友兩回事，要認真考慮。」
學會帶眼識人
趙彤又自揭曾遇愛的教訓，她說：「試過有前男友一腳踏三船，搞到一男三女對峙，我冇喊，只係覺得好似拍戲咁，後尾我退出，個男仔同其中一個女仔結婚，但婚後仲有第三者，我真係要多謝佢，佢係邊個？胡瓜個女婿。」
問到會否不敢再入情關，趙彤相信這次是個人問題，但睇男仔就會小心，更會特別留意幾個星座，如雙魚、雙子、人馬就係花心三甲。雖然學識觀察人，但她表示情路仍非無往不利，因她能醫不自醫，只要遇到心儀男士，頭腦仍會不清晰。
文：影視組
攝：黃叔榮
場地：AKA Japanese Cuisine Lounge