傳珮嘉愁爆 囝囝掃背減壓

Maggie與圈外老公十分重視囝囝Jasper的童年生活，覺得小朋友有適當玩樂時間很重要。她謂：「我同老公工作幾忙都好，每個星期都一定會抽一日時間family day，所以今日就嚟迪士尼好萊塢酒店食自助餐，可以同米奇老鼠影合照，相信囝囝一定好難忘。」問到會否讓可愛精靈的Jasper做童星？Maggie笑言：「囝囝好受歡迎，仲多嘢拍過我，但最重要都係畀佢留個開心嘅童年回憶。」

心靈導師 摸頭掃背

Maggie坦言囝囝是自己的心靈導師，更是一生中最大的恩典：「之前我啱啱夾Band，同隊友有好多拗撬，成日都好大壓力，有一晚返到屋企，我壓力爆煲狂喊，Jasper就走過嚟一直企喺我身邊，仲摸我個頭、掃背氹我，嗰一刻我真係好感動！」

再闖樂壇 家人支持

Maggie現時組樂隊Holic Jam，在音樂路重新出發。由於有囝囝和老公的支持，令她充滿原動力：「我老公係一個好樂觀嘅人，結婚之後我嘅脾氣都改善咗，有咗囝囝之後我亦冇咁悲觀，依家我就算作歌都多咗好多正能量。」