湯洛雯甩嘴照贏 擺明偏私

14位候選港姐與等候「復活戰」的陳華鑫及鍾麗前晚在番禺參與「旅遊大使獎」選舉，佳麗先分四組進行隊制賽，隨後再以PK賽鬥才藝爭逐獎項，全晚最有睇頭的表演要數黃心穎跳中國舞，習舞12年的她展示高難度舞技，身體柔韌性極高，跳舞「拗晒腰」盡顯功架，輕易贏了對手王舒銳。

僅花一星期練習

而在分組賽中，一直盛傳獲無綫厚待的湯洛雯，唱出林憶蓮的《至少還有你》，歌喉尚算不俗，但中途「甩嘴」，仍擊敗穿上民族服裝表演韓國歌舞的譚曉榆，成功進入五強，與張名雅、朱千雪、林泳淘、黃心穎爭獎，當大會宣布賽果一刻，「棟篤唱」的湯洛雯竟然再下一城，擊敗了跳中國舞的黃心穎，令偏私之說傳得更盛！

黃心穎拗腰表演中國舞，盡顯功架。

湯洛雯（左）跳舞似乎不夠投入。

湯洛雯甩嘴照贏，她亦有自知之明，她謂：「係呀，都甩咗一兩個字，首歌練咗一個禮拜，其實有諗過表演彈豎琴，但係好耐冇練，都係唱歌有信心啲，唔知評判點計分，可能贏在觀眾畀分。」雖然明顯獲無綫厚待，為打入十強爭大獎鋪路，但湯洛雯接受訪問時，仍表示自己一日未入到十強也有壓力，不過，觀乎無綫對她的痛錫度，打入十強應指日可待。