譚凱琪疑神疑鬼 失眠1星期
有線藝人譚凱琪（Zoie），之前雖曾短時間擔任靈異節目主持，但直言承受相當大壓力。除了試過拍攝期間驚爆嚎哭外，還經常疑神疑鬼兼曾失眠長達一星期，難怪她說：「真係細膽啲都唔掂！」
經常周圍飛拍攝旅遊節目的譚凱琪（Zoie），早前兼任《怪談》主持，不過由於後遺症太多，只擔任了數個月便放棄，她說：「我唔想成日喊苦喊忽。未做呢個節目之前，我以為自己唔算細膽，因為我從未主動接觸過呢類型嘅嘢，呢個節目令我見到好多解釋唔到嘅嘢。」
猛鬼橋開工
Zoie表示最難忘是曾跟攝製隊出發到猛鬼橋拍攝，當時擔任靈探的她，坦言見到身邊人「鬼上身」，即場嚇至嚎哭：「佢突然變得好惡同發晒癲，係咁要衝落河。我企喺河隔籬，一來好驚佢有生命危險，二來又驚佢推我落去，三來又驚有手掹我落水，所以喊咗出嚟。」Zoie當日做完節目回家時由於正值凌晨，為免獨自留在家中會過於害怕，她只好找看更吹水及朋友吃消夜打發時間，直到天光才回家：「我之後失眠足足一個禮拜，呢個節目真係唔係一般人可以做到，膽細啲都唔掂。」
驚酒店照鏡
由於工作關係，Zoie經常要獨自入住酒店房間，她坦言拍攝《怪》之後心態轉變很大：「以前出trip一個人一間房無問題，但嗰次去馬來西亞，我就好疑神疑鬼，例如喺酒店落妝嗰陣，會好驚照鏡嗰個唔係自己，又好驚沖完涼打開條浴簾會突然有人，又驚瞓瞓吓覺擘大眼會有人企喺床尾，真係好大心理壓力。」
文：影視組