周麗淇設計初哥 任踩唔嬲
身兼歌手及演員的周麗淇，最近化身設計師推出親自設計的鞋履系列，從小熱愛設計的她自言夢想成真，她更不介意自己的簽名被人踩在腳下，只想心血結晶能獲大家欣賞。稍後她還會推出自家品牌的生活用品，實行將天馬行空的創作意念發揚光大，融入實際生活之中，令生活變得更時尚。
周麗淇（Niki）早前與I.T旗下品牌Venilla suite合作推出Crossover鞋履系列，也令原已對設計有着濃厚興趣的她想繼續向這方面發展。不過她並非想轉型做設計師，而是想作更多不同嘗試。
記：今次係你第一次做Designer？
Ｎ：第一次Design鞋，有自己條Line。讀書時都讀過Design，一直都好有興趣。今次嘅合作好重要嘅一點係個Collection真係我自己設計嘅，而唔係只係攞我個名嚟出Product。但個Collection嘅設計都唔可以大玩，要Practical，太尖同太高都唔得，要Wearable。
我之前特登去咗意大利同歐洲其他地方睇啲Designer造鞋，自己都做咗好多Research，又開咗好多次會，不過發現最難嘅係搵質料，一件物料係可以影響到成件設計嘅Outlook。好似淨係令面嘅黑都分幾十種，金色又幾百種。原來一對鞋有好多Details，Design真係好好玩，可以學到好多嘢。
半年設計過程順利
記：今次設計鞋用咗幾多時間？
Ｎ：半年，過程都算順利，佢哋好遷就我。設計完成晒後，佢哋發現我漏咗簽名，當時我出緊Trip，我就喺火車上面諗個簽名，畫好之後就用電話影低再Send返去。佢哋有問我介唔介意個簽名印喺鞋度，好似畀人踩咁，我梗係唔會介意，設計得鞋就預咗畀人着，簽名唔係擺喺對鞋度擺喺邊？我唔會介意呢啲嘢。我都有將自己嘅設計送畀朋友，想人哋着我啲鞋，見到人哋着住，我會好開心，我會好Welcome人哋着住我啲鞋搵我簽名影相。呢種感覺同拍戲唱歌好唔同。好多男仔問我點解唔出男裝，我都想，但暫時冇信心。
所見所聞與人分享
記：轉型做Designer？
Ｎ：人慢慢成長就要不斷改變，唔係只得一個身份，可以有好多個角色，趁年輕有機會應該嘗試多啲唔同嘅嘢。我好享受呢種生活，好慶幸有好多人支持我，令我可以將我人生嘅經歷放入我可以發揮嘅嘢度，我想將自己所見所聞融入生活，再同人分享。
我自己好鍾意挑戰同嘗試，依家可以算係夢想實現，希望可以透過自己嘅經驗話畀人知夢想會有實現嘅一日，係做得到嘅。
記：除咗鞋仲想設計咩？
Ｎ：嚟緊我會設計生活產品，可以喺日常生活用到嘅嘢，希望年尾可以推出。我想將生活上應用到嘅嘢變得更加時尚。遲啲我會再去歐洲修讀一個課程，我對設計方面好有興趣，想再向呢方面做多啲。
化生活用品為藝術
記：點解會想設計生活產品？
Ｎ：我係個好鍾意發白日夢嘅人，好鍾意諗嘢，天馬行空，成日問點解，所以我好鍾意創作，想將自己嘅諗法放喺生活上，創造一啲可以方便日常生活瑣碎事嘅產品出嚟。咁啱我識咗個生產商，促成咗我推出自己嘅Brand。我想將生活上嘅用品變成為藝術品，想由平凡變為不平凡，成為潮流產品。其實我都鍾意室內設計，如果將來再有信心啲都想試吓。
記：你認為咩係時尚？
Ｎ：簡約，帶畀人舒適，功能方便，呢個亦係我做人嘅方向，愈簡單先愈靚，唔使太複雜，簡單都可以好吸引，簡單得嚟要靚仲難。
記：覺得自己算唔算潮人？
Ｎ：我覺得潮流唔係跟隨，而係創造，不過人哋未必會跟隨。每個人都可以創造屬於自己嘅一套，做自己鍾意嘅嘢，有獨特嘅Character先至可貴。
玻璃鞋情意結
談到自己首個鞋履系列，Niki即滔滔不絕，大談當中的設計意念，每對鞋都有她喜歡兼旺她的金色元素，金色是Signature。其中一對透明高跟鞋的靈感就是來自玻璃鞋，她說：「我自己都有對全透明嘅鞋，Keep咗十年到依家都仲喺度，對玻璃鞋有一種情意結，希望搵到一個合適嘅男仔，有日會拎住對鞋嚟搵我。」
欣賞Stella環保
問Niki最欣賞哪個Designer？她說：「好多，因為個個都有唔同嘅風格，好似Stella McCartney就好環保。好多日本生活產品設計師嘅Design都好簡約但係又好靚，好有自己獨特嘅風格，一個人可以搵到自己嘅方向，仲要咁成功，好難得，我好欣賞佢哋。我唔會淨係睇牌子，會睇埋個設計內裏嘅故事，唔會名牌效應。」
採訪：張嘉敏
攝影：劉智源
髮型：Debby Kwan@Hair（CWB）
服裝：G.V.G.V.、commuun（I.T）
場地：Hair（CWB）