莊思敏叫老竇 網交小心
為人父母者，就算對子女做足一百分，不過在子女眼中，父母都會有改善的空間。趁着父親節來臨，身為孝順仔女的名模周汶錡、諸葛紫岐、歌手孫耀威等，都語重心長地提點父親要注意飲食。相反，「宅男女神」周秀娜雖然希望父親戒酒，但卻不忍心剝奪他的嗜好，所以只買補酒孝敬父親。而莊思敏最搞笑，提醒老竇網上交友小心被人呃。
莊思敏
「唔想老竇成日上社交網識人，依家好多網絡陷阱，一陣佢畀人呃點算？」
諸葛紫岐：咪再做辣爸
「我爹哋好鍾意食辣，煮嗰陣已經好嗆鼻！佢年紀唔細，唔想佢食咁多辣嘢，對身體唔好。」
王大業：難忍長氣父親
「唔想爹哋咁長氣，有時真係令我忟忟哋！依家藉住呢個機會話佢知，呢個係父親節禮物，哈哈！」
歐陽妙芝：太順得人
「我爸爸係一個善良、和善嘅人，好順得人意。我想佢變得有自己方向啲，唔好樣樣嘢都就晒人。」
周汶錡：戒吃肥膩
「其實父親咁大年紀，都唔想佢為我改啲乜啦。只希望佢食少啲肥膩嘢，節制下，不過最緊要係佢開心。」
孫耀威：支持戒煙
「我最想老竇戒煙，因為吸煙對身體唔好，而且好臭。雖然佢唔係食得多，但最好就戒啦，我哋全家人都好支持佢。」
汪詩詩、汪圓圓：放開自己
「爸爸性格好保守，乜嘢都唔會同我哋兩姊妹傾。我哋希望可以同佢好似朋友關係咁，同我哋分享多啲嘢。」
黃浩然：以身作則
「父母喺我心中係冇錯，依家為人父之後，除咗工作家庭兼顧外，仲要做個好榜樣畀我BB睇。」
周秀娜：少飲為妙
「我最想父親改咗飲酒嘅習慣，雖然我到外地做嘢時見到特別嘅酒，都會買嚟送畀佢，但始終唔想佢飲咁多，可能遲啲會改買補酒畀佢。」