謝賢：「娛樂」維繫感情

我一生中曾有四個女人，嘉玲、芳芳、甄珍、拉姑，人人都問我最鍾意邊個？最鍾意嗰個咪當時一齊嗰個囉！同第二個一齊就唔記得之前，如果全部要記得個腦咪要好大？我已經70幾歲，嘩！記70幾年嘢咪連個大花盆都裝唔落？我都唔想有咁多段婚姻，但其實都係兩段啫，哈哈，女朋友嗰啲唔算吓話？

CoCo	嘉玲	蕭芳芳

嘉玲嫁人　心痛出走

依家係咪最愛CoCo？唔愛佢點同佢一齊呀？都8年啦。舊時啲人點解生咁多仔女？冇娛樂嘛，（造人）係唯一娛樂。我依家梗係有呢樣「娛樂」啦，一個廿幾歲嘅女朋友可以同我keep到8年，如果冇呢樣嘢點維繫？呢樣嘢好正常，我不時同佢哋分享「人生經歷」，好多女仔都聽得津津有味！

甄珍

狄波拉

其實當年我預備同嘉玲結婚架！我入行無耐，嘉玲入咗嚟我間公司，之後我哋就拍拖，一拍就十年。點知我「砰拎崩冷」好紅，見識到呢個世界原來咁鬼好玩，咪日日出去玩，去夜總會跳舞、同朋友打牌咁，我好窮出身，見到個世界咁靚，又可以揸靚車着靚衫，咁咪同嘉玲遠咗囉，結果有日嘉玲走嚟問我：「有個人（即現任丈夫）想追我喎？」我問完係邊個，就話「你咪同佢食吓飯囉。」點解畀佢去？因為我要去玩嘛！我諗住佢唔甩得我嘛，哈哈，幾威呀嗰陣，點知半年後，佢突然話要結婚啦，我嗰時先知冇得掹。講得出呢句真係好hurt，hurt咗咪去環遊世界囉，嗰時係1966年，真係好難忘。

隔咗好耐我都冇女朋友，去夜總會跳舞梗係好多女仔埋身，但我偏偏唔鍾意，我個人係咁，唔鍾意女仔追我。之後就到芳芳，大家拍戲日久生情，同芳芳拍拖兩年左右，因為佢咩都要做到最好，嗰陣佢要我讀英文，我話玩都唔夠時間，仲叫我讀書？佢好有原則，慢慢大家就疏遠咗。蕭芳芳係一個好自主好勤力嘅女仔，唔會因為拍戲而沙沙滾，所以佢依家呢段婚姻好好，佢先生好啱佢。

緣分難擋　即娶甄珍

之後我同甄珍結婚，呢個就真係緣分，緣分要嚟擋唔住，但要完就完。我哋拍拖六年，結婚兩年。冇得比邊次分手傷啲，一個家庭拆開，梗有傷感，大家係和平分手，你有冇見過我啲歷史係我做第三者呀？我絕對唔做呢啲嘢！之後就同拉姑結婚，我嘅情史直頭燦爛啦！

口述：謝賢　

筆錄：名人組