周潤發賭神look 貓步掀高潮

前晚時裝品牌HUGO BOSS在北京舉行「BOSS Black Fall/Winter 2012 Fashion Show」，並宣布周潤發成為旗下首位亞洲代言人，為隆重其事，發哥更壓軸行騷，其他出席嘉賓還有劉嘉玲、吳尊、模特兒Mandy Lieu、張梓琳、泰迪史雲頓及張赫等。

大會送生日卡

原來當晚適逢是發哥的生日，難怪穿上一身玫瑰紅西裝的他特別醒神，梳了經典「賭神」髮型壓軸出場，全場報以掌聲，掀起全晚高潮。鮮有行騷的發哥毫不怯場，更自行加入舞蹈動作，還熱情地走向台下的劉嘉玲前相擁兼親臉，而大會特別播放生日歌及由品牌亞太區總裁Dr. Gerrit Ruetzel送上生日卡向他道賀！

劉嘉玲（右）與發哥發嫂老友鬼鬼，甫見面即與品牌高層合照。	張梓琳以超Deep V裙現身，成為全場最性感的嘉賓。	吳尊亦型爆撐場。

其後發哥被指髮型像「賭神」，他聞言即摸一摸頭髮笑說：「我似甄子丹，佢都成日着紅色踢死兔。（行騷有咩感覺？）正正經經，好玩！（酬勞呢？）問周太，係商業秘密。」他自爆發嫂送了香吻和心作生日禮物。

劉嘉玲表示她與老公梁朝偉互相珍惜，故結婚以來都相當恩愛。	泰迪史雲頓和張赫均盛裝赴會。	張赫

嘉玲珍惜偉仔

而另一嘉賓劉嘉玲表示得知發哥生日，要跟他擁抱一番。對於有指鞏俐已離婚三年？她說：「唔知，呢個婚姻結果（離婚）係令人唏噓，祝福佢快啲搵到另一個開心嘅婚姻生活！」記者問她跟梁朝偉有甚麼相處之道？她說︰「教唔到人，需要兩個人磨合，（你哋係夫妻典範？）唔可以咁講，只可以講我同偉仔都互相珍惜，兩個人過咗一段時間會習慣咗對方，所以要製造新鮮火花，（咁會唔會生BB？）要適合嗰對夫妻先得，唔會跟潮流。」