諸葛幫殘疾人解困 Baby助天真小童
不少藝人名人都愛心滿瀉，樂於助人，不時都會出錢又出力參與慈善活動，幫助有需要的人，他們心中往往也有最需要幫助的「目標」：Angelababy和王敏德會先幫助天真無邪的小朋友；區文詩最想幫助弱勢的長者；諸葛紫岐則希望能解決殘疾人士的困難！
《時裝店開幕派對》
Angelababy：「最想幫小朋友，小朋友天真無邪，好純真，我自己都有助養緊小朋友。」
《黃金海岸遊艇展覽會活動》
王敏德：「一啲冇家庭嘅兒童，家庭溫暖對小朋友嘅成長好緊要，心智同思想可能因為咁而受影響，我會盡量幫到幾多得幾多。」
《手袋活動》
劉心悠：「我唔會叫做善事，係幫人。我會了解咗佢哋需要咩，然後先去滿足佢哋嘅所需。」
《apm世界級鮮花時裝藝術展》
馬詩慧：「智障或者傷殘嘅人，我會特別想幫。其實我個人好眼淺，好多時聽家人嘅分享，已經喊到收唔到聲。所以我成日都會帶仔女去做義工，等佢哋知道自己身體健全係有幾咁幸福。」
《時裝店開幕派對》
諸葛紫岐：「我最想幫一啲身體有殘障嘅人，可能佢哋日常生活會遇到多啲困難，覺得佢哋最需要人幫。」
《香水發布會》
趙哲妤：「我最想幫助冇得讀書嘅小朋友，因為小朋友係社會未來嘅棟樑，而且知識可以改變將來。我曾經去過山區學校探訪，去派物資同米袋，同埋同佢哋傾吓偈。」
區文詩：「我最想幫老人家，有陣時見到佢哋喺街度執紙皮、推車，真係覺得好心噏。不過除咗金錢同物質上可以幫助佢哋之外，其實寵物治療都係其中一個方法。我都諗住帶我隻狗去上堂，希望可以為人帶嚟歡樂。」
《時尚活動》
松岡李那：「我覺得大家應該多啲關心天生有殘疾嘅兒童，佢哋已經好弱小，年紀亦都好輕，我哋唔幫就冇人幫到佢哋。」