陳法蓉:要愛到地老天荒

亞姐陳煒(煒哥)、港姐陳法蓉,兩位冠軍級靚女相遇,話題除講及選美經歷外,同是有戲癮之人的她倆難免集中交流演戲心得,強悍「煒哥」更向「大水喉」法蓉請教如何在演戲時可以「話喊就喊」。求愛若渴的法蓉正等愛來臨,堅信有一見鍾情、天崩地裂的童話愛情故事,所以感情特別豐富,「人妻」煒哥又上了寶貴一課!

陳煒:煒 陳法蓉:蓉

煒:我哋係多年前合作亞視劇《美麗傳說》時認識,劇中法蓉個角色好慘,日日係咁喊,我好佩服你咁多眼淚,連一啲背住鏡頭嘅戲,法蓉都照喊,導演話你啲眼淚濺出鏡頭添……點解咁喊得嘅?

蓉:我天性感情特別豐富,睇微博見到虐狗新聞我都流晒眼淚,有時同蔡少芬一齊睇戲,仲會同步跟個戲中主角一齊演戲。

煒:鬥快喊?

蓉:咁又唔係!鍾意演戲啫。

煒:你仲有拍劇?

蓉:我以為你問我仲有冇拍拖添?哈哈……

煒:兩樣都想關心。

蓉:其實早幾年返內地發展,拍咗成百集劇,好多時反胃唔舒服,返香港又冇嘢,以為係水土不服,返去再開工又不斷嘔,仲被人誤會「有咗」,後來返香港睇醫生,先知原來係胃液倒流,醫生話好嚴重,處理唔好會變為喉嚨Cancer。其實係緊張、食無定時所致,嗰時我知要減少拍劇,當時咁啱又轉咗新經理人公司,咪暫停拍劇轉拍廣告、做騷,都好開心又賺到錢,不過,我都有戲癮,公司都傾緊內地劇,依家又有新電視台,唔排除會再拍劇!

好恨拍拖

煒:感情方面又點呢?恨唔恨呢?

蓉:依家係未有(新感情),當然恨啦!我真係發夢都諗住。

煒:要我介紹?

蓉:我一向唔信介紹,信自己感覺,我想嘅伴侶係要孝順、專一、唔止鍾意我優點,仲要愛上埋我缺點!

煒:其實我都係尋尋覓覓先遇到我老公,佢因為工作,我哋成日分隔兩地,但都有掛住,每日都會WhatsApp。其實我哋頭三個月拍拖時就有火花要日日見住,之後變成一齊生活嘅親人,見少啲反而少摩擦。

蓉:朋友形容我係發夢,因為我好追求愛,每次愛都天崩地裂,堅持愛仍有天荒地老、永遠愛我嘅童話式愛情故事,佢哋聽完「唔」一聲後冇出聲,話我細路女。

煒:有冇諗過改變吓自己?

蓉:唔會!我會堅持,呢個先係我,本能反應,當遇到嗰個人時我第一下就會知!

包容一切

煒:當我認定我老公後,好多唔好嘅嘢我都包容,掉番轉,我冇晒堅持。

蓉:做唔番自己咪好辛苦?有冇嗌救命?

煒:我會遷就佢,因為唔可以要求兩個人一樣,愛係要付出。

蓉:就係因為我太愛佢,想佢同我諗法一樣,我每次愛都好投入好似吸毒!我要求高其實佢都辛苦,但我真係唔識得好似你咁諗。

煒:我冇諗過改變我老公,惟有認命啦。

蓉:期望改變人都要改變自己先,雖然我識講但都係做唔到,我都知一日飲八杯水係好。

煒:咁你真係要飲多啲水喇!

大美人的選美經

陳法蓉和陳煒先後相距七年參加選美,煒哥被慫恿參選,法蓉則是圓童年夢想,不過二人都是殊途同歸,分別贏得89年港姐冠軍和96年亞姐冠軍。

蓉:選港姐係我童年嘅夢想,細個時捲住本周刊當權杖,披住條毛巾當加冕斗篷,我會諗一世人點都要做一次紅地氈嘅公主!到大個咗去外國讀書,放暑假返香港,朋友選唔成就鼓勵我,不過,我上到台都好驚,最驚係泳衣環節,因為除咗去游水係唔會着泳衣行出嚟嘛。

煒:我就係讀書時做part-time model,化妝朋友慫恿我,我覺得是但啦,咪去囉!不過我選美時第一次上台都好驚,個口係笑緊,其實係震緊。

化鞋底妝

蓉:我覺得選美嘅女仔,係小圈子嘅大美人,我好想畀自己留一個回憶!

煒:選美學到好多嘢,接觸好多唔同界別嘅人,化妝、儀態乜都有得學。

蓉:我嗰屆冇教化妝,當選後我第一個job係做張學友音樂特輯,出到去冇人幫我化妝,咪自己化,點知畀人笑我做乜貼咗兩個鞋底喺塊面度,之後咪抹咗去囉!

文:影視組 攝影:劉智源 場地:Monster Sushi

陳煒髮型:Matthew Ng@Hair Corner(Central) 服裝:I Posh

陳法蓉髮型:II Couple-Jackson Yung 化妝:Make up School-Ling Chan