陳偉霆：咪拖家人落水
陳偉霆無辜捲入猛男艷照風波，他強調不認識涉案人劉定成。他昨日被記者追問有關拍照一事，他說：「總之喺陳偉霆字典入面冇發生過影不雅照！」他又不滿事件把家人拖落水！
轟動娛圈的男星艷照案件，日前連英皇旗下藝人陳偉霆亦被牽扯入事件中，涉案富商劉定成在庭外指陳偉霆曾讓他「拍照」，英皇前日雖發表聲明指內容失實兼保留追究權利，但事件難免令陳偉霆心情受影響。昨午他到電視城為直播節目綵排，問到他可會為事件生氣？他說：「咁又唔會好嬲，不過心情梗係有受影響。（奇怪開你名？）我自己都諗唔明，諗嚟都無補於事，我真係唔認識佢。」
屋企冇人識佢
對方聲稱是透過其家人而認識他，陳偉霆即說：「我有啲反感，就係唔可以拉我屋企人落水。我睇到佢話識我屋企人，我都覺得好緊張，即刻打畀屋企人問，佢哋全部都話唔識佢，同埋我都係唔識佢嘅，我連睇完佢張相都完全冇印象。」表示會保留法律追究權利的他，被問到曾否影過泳褲照？陳偉霆說：「我行Fashion Show你哋（指記者）都影過啦，我可以講我完全冇影過一啲不雅嘅相，完全唔會喺我陳偉霆嘅字典度發生呢一樣嘢。」他又強調自己從未穿過三角褲行騷，最多只會穿滑水褲。對於被讚「青春可愛」，陳偉霆即一臉無奈的說：「真係唔評論囉，真係唔識講。」問到其女友蔡卓妍有否就事件問到他時，陳偉霆強調不想另一半的名字出現在這宗新聞之中。
洪卓立撐師兄
此外，洪卓立昨出席活動力撐師兄陳偉霆：「大家冇理呢件事，我唔會信。」同場的江若琳亦力撐陳偉霆和羅仲謙：「呢件事我比較信artists，我對佢哋印象幾好，佢哋比較錫身，都絕對有條件半裸露上身，但下身我就梗係唔知啦。」
文：影視組