舒淇日日母親節 禮物任屈
昨日母親節，台星舒淇、范曉萱和羅志祥（小豬）紛紛頌親恩，舒淇笑言經常被母親屈禮物，小萱就帶着母親母女裝宣傳合唱專輯，小豬更在台上跟母親又唱又跳兼咀嘴，大晒溫馨母子情！
舒淇、任賢齊、羅霖等昨日在山頂為一起步禮任嘉賓，昨日母親節，舒淇和身在台灣的母親天各一方，她謂稍後會致電對方，因平時都會送禮物，不用等特別日子才做，問母親會否介意？舒淇說：「佢成日都收好多啦，又屈我好多禮物，有時佢會話我啲保養品幾好，我就會叫佢攞去。」
舒淇還踢爆母親愛穿她的衫：「最好笑係有次我着住件衫，媽咪話鍾意，之後就見佢着住，不過件衫就撐大咗，最後我送咗畀媽咪。」為了投母親所好，舒淇現在買衫都會特別挑選大size款式，還讚母親好前衞，會穿貼身衫和迷你裙。
溫馨黑白配
而范曉萱（小萱）昨日就孖住母親Miss D.D現身香港宣傳合唱專輯，兩人以黑白配溫馨登場，小萱送了一個印有唱片封套的手袋給母親，她謂當日母親答應灌錄專輯，唯一條件是要做善事，故將這兩天的唱片收益捐贈願望成真基金幫助來自單親家庭患癌的小朋友，她說：「因為自己也來自單親家庭。」小萱希望每年都出一張碟，紀錄媽媽的聲音：「希望下次媽媽開演唱會，請我做嘉賓。」
皮短褲撐仔
至於小豬前晚則在台中開騷，唱片公司安排羅媽媽做神秘嘉賓，她穿上皮短褲襯高踭鞋升上台給兒子驚喜，小豬興奮說：「我剛才還以為是黃小琥（歌手），原來是我媽！」兩人又唱又跳還在台上嘴對嘴親吻，溫馨滿瀉。
文：音樂組