楊秀惠甩拖睇相醫迷惘

早前與金融才俊男友Ray甩拖的藝員楊秀惠在新劇中沉迷塔羅牌,凡事皆占卜問福,原來早前楊秀惠甩拖後也陷入迷惘期,當時她也透過手機塔羅牌Apps占卜,可是心情卻愈玩愈差,幸後來與友人傾訴後已雨過天青。

自言向來並不迷信的楊秀惠甩拖期間卻一反常態,既去睇相,更不停用手機塔羅牌Apps占卜,可是心情卻每況愈下,她說:「當時心情唔好,所以就成日用手機塔羅牌apps嚟占卜,得出嚟嘅結果好嘅當然會開心啲,但係唔好心情就更加差,後來都係搵朋友傾訴,加上開工拍劇,依家已經好番晒。」

避免同朋友爭仔

楊秀惠在劇集《當旺爸爸》戀上戇男蕭正楠,但戲中與好姊妹鍾嘉欣又因馬浚偉而起波瀾,問到楊秀惠現實中可有與老友「爭仔」﹖她說:「咁又未試過,可能大家嘅口味唔同,將來亦會避免呢啲情況發生,愛情同友情都好重要,呢啲問題處理得唔好,可能連朋友都冇得做。」

楊秀惠在戲中碰上絕種戇男,她不諱言以往不懂欣賞,隨着人生閱歷增長,現在也不會落閘抗拒,她說:「以前年紀細覺得呢類戇男唔啱自己,但係依家會識得欣賞佢哋唔蠱惑,唔使擔心咁多,可以慢慢由朋友做起,但係如果真係有呢類男仔,反而擔心佢畀人呃,需要好好保護佢。」

採訪:影視組

鞋:DYOS Avenues