松岡李那 對人歡笑背人愁

日模Linah隻身來港，難敵孤單及壓力，曾患上憂鬱症，每天「摺埋」在家中，與世隔絕不問世事，幸得當時男友Ground-Zero老闆兼設計師Philip Chu發現，才重拾昔日笑容。

Philip與Linah再見亦是朋友。	Linah經常為時裝表演出騷。	Linah以火紅比堅尼上陣，出任啤酒節代言人。

「其實我都唔知點解自己會患上抑鬱症，淨係知道嗰時唔想講嘢、唔想做嘢、唔想食嘢、唔想買嘢。嗰1、2個月，淨係想匿喺屋企，咩都唔做，由朝到晚都攤喺張床。嗰陣時屋企隻狗仔都好慘，我都冇心機理佢。

放大圖片

放大圖片

我好鍾意自己份工，不過嗰陣時好想放棄。就算我有工作，出到去都只會坐埋一邊唔出聲。同人打招呼講『Hello』，已經係盡晒全力。同事都好擔心我，不過第一個發現我有問題嘅係Philip（前男友），佢同我講『Linah應該係一個好開心嘅女仔。』所以就帶我去睇醫生，佢真係好關心我，直至依家分咗手都仲係，真係好多謝佢。

依家我已經康復得七七八八，雖然醫生叫我繼續食藥，不過我已經冇再食，我覺得啲藥改變咗我嘅性格，我唔想咁。我都冇再覺得唔開心，不過好容易會好嬲，依家我淨係想有多啲工作，做嘢嘅時候最開心！」

唔識點餐 硬飲可樂

初來香港，完全不會廣東話，英語亦不靈光，不但工作上遇上困難不在話下，就連日常生活也應付不了。Linah下了很多功夫學英語，現在與人溝通已不成問題。

「初初嚟到香港，我可以話係完全唔識英文，唔好話同人溝通，就連去餐廳叫嘢食都唔識。所以開頭嗰2、3個月，成日都去食麥當勞或者吉野家，因為佢啲餐有號碼，我淨係講個數字就得。不過其實我嗰時唔想飲可樂，不過因為唔識講，啲員工問我飲乜嗰陣，我都係會照叫『Coke』，真係好無奈。所以我嗰時每日都會用4、5個鐘自學英文，差唔多4個月就開始溝通到啲，冇咁辛苦。

之前拍《戀夏戀夏戀戀下》，導演要我講『呢個都係細路？』我都未消化得嚟就要即刻拍。我完全唔知句嘢點解，問身邊嘅人點解，佢哋都會叫我拍咗先再講。因為唔想拖慢進度，當時我只係記住個發音就跟住講，好彩句嘢唔長，淨係NG咗2次。所以我真係好想自己識廣東話，如果廣東話好啲，我想拍多啲電影。」

模範女友 筍中之筍

Linah對於感情事一向低調，早前與男友Philip和平分手。回復單身的她笑言自己是廚藝一流的模範女友，絕不擔心成為剩女。

「其實我同Philip係和平分手，一個經大家討論出嚟嘅結果。雖然喺拍拖期間成日嗌交，不過我哋每次都好快和好。分手嘅原因係大家都想專心工作先，並唔係因為第三者。其實同佢有好多開心嘅回憶，最Sweet嘅係佢作曲畀我，仲填埋中文歌詞教嚟我普通話。我哋仲錄埋音，好好玩，所以我哋到依家仲係好好朋友，一直有聯絡，仲會同朋友一齊搞Home Party添。

雖然我回復單身，但係我完全唔心急搵男朋友，亦唔心急結婚。我好肯定自己係一個好女友！喺我14歲嗰年，我每朝都突登早啲起身，幫男朋友準備愛心飯盒。佢就喺返工前去我屋企拎，3年間風雨不改。我一定會整啲好健康嘅食物，就算整甜品都會低糖，豆腐冬甩係我嘅必殺技！而且我好識得打理家頭細務，見到男朋友屋企亂，一定會忍唔住幫手執。我真係可以話係筍盤中嘅筍盤！哈哈！」

露得高貴

Linah來港的首個工作，就是擔任蘭桂坊啤酒節的代言人，當然少不免要以比堅尼上陣。Linah坦言不介意性感，最重要是露得高貴大方，而不是賣弄色性。擁有33C驕人上圍的她笑言：「我從來都唔覺得自己係走性感路線，我係走活潑可愛路線，總之想令到身邊嘅人開心！」

後記：細節做足

即使採訪當天沒有髮型師在場，Linah亦根據衣服的不同風格，自行換髮型。見她熟練地結辮子、扎髻、梳馬尾，實在令小記不得不驚嘆日本人對於細節的要求。

口述：松岡李那 筆錄：龔凱欣

攝影：劉智源 服裝：bread n butter