周柏豪正身在泰國與江若琳師妹倪晨曦及內地演員周泓拍戲，他在當地愛上至肥「冬甩」，每朝起身必到酒店附近冬甩店打躉，最少日食六個冬甩的他甚至帶到片場「萬歲」：「食冬甩一定要襯杯凍朱古力，咁食法唔肥就怪，食咗成個月足足肥咗十二磅。」因腰圍不斷膨脹，褲頭愈來愈窄，甚至未能拉埋褲鏈，除了勞煩服裝師不停將褲腰圍解鬆，身為型男的他更不敢上磅：「返嚟之後會努力打波減肥。（腹肌變肚腩？）少少啦，我會盡快消滅佢！」
柏豪深得老闆寵愛，親往泰國探班之餘更帶他玩「高卡車」：「老闆話有機會帶我去珠海賽車，不過就唔啱時間，細細哋玩住高卡車先。」雖然過程刺激，柏豪自爆一踩油已失手撞欄：「啲欄撞爛晒，因為用好多體力，玩完會好赲，仲手震同輕微抽筋。」