花心女子

花花圖案一直深得各大時裝設計師歡心，是時裝界每年春夏必Hit的潮流元素。而今年就流行大花圖案和立體花，如果不想效果太Girly，可以選擇花Tee或花恤衫，亦可一湊這個花花熱。不過並非人人都可「花」得起，還是趁年輕穿較好。名模陳嘉容就大讚劉心悠一身花裙Look恍如仙女漂亮動人。

「好靚，好似仙女，感覺清新，露膊又有少少性感，好夏天。條裙好靚，佢着得好好睇，個髮型都好靚，成個Look好Sharp，好賞心悅目。」

「白色係好穩陣嘅顏色，條裙上面嘅立體花好特別，佢嘅髮型同化妝都好Match，個紅嘴好襯呢個look。條裙本身好多details，佢配襯簡單嘅accessories就啱喇。」

「OK，條裙唔夠時尚，有啲鄰家女孩Feel。佢甜美嘅笑容，仲有化妝、髮型都襯得好靚，加番唔少分，救番個Look，都合格嘅。」

「好靚女，條裙好靚，佢襯對橙紅色Platform鞋，個色撞得好好，令成個Look變得好佻脫，好有夏天嘅感覺，青春逼人，輕輕露對長腿已經殺晒。」

「好似新娘，呢條裙喺結婚時可以當晚裝着，着到佢老積咗，唔啱佢年紀，如果將條裙改成迷你裙，或者換啲鮮色啲嘅顏色，例如粉紅色、紫色，會Young啲同Fashionable啲。」

「有啲娘娘哋，浪費咗佢個靚樣同一副模特兒身材，件花花Top着到佢老咗，唔Match佢年紀。」

「OK，雖然係花花，但感覺無咁Girly，潮得嚟型型哋，Casual大肚Look。」

陳嘉容，香港著名模特兒，曾為各大國際品牌行時裝騷，在時裝界打滾多年，對時裝方面的認識無論是理論還是實戰都難不倒她，近年更為電視時裝節目擔任主持，化身Stylist教人配襯衣着打扮。