周永恒（Roy）的歲半愛女信希，前日在家中不慎被熱蔗汁燙傷額頭和左面，即召白車入院診治，被列為一級燙傷，昨天信希左頰起了大水泡，懷孕三個月的媽咪趙頌茹（阿Yu）因自責失眠，Roy更擔心囡囡變「鍾無艷」！
唱作歌手周永恒跟老婆阿Yu婚後育有一女信希，去年小產的阿Yu現懷有第二胎，一家歡天喜地迎接小生命來臨，怎知前日信希卻不慎被熱蔗汁燙傷額、面，令兩公婆憂心忡忡。昨日Roy接受本報電話訪問說：「囡囡自己攞枱上嘅熱蔗汁飲，可能個杯太重，唔小心倒瀉，淥傷咗半個額頭同左面，老婆驚到喊，即刻call白車。」
幸好小信希好堅強，去到醫院竟然冇喊，護士幫她洗傷口時還撩她玩，甚至叫她笑也笑，Roy說：「醫生話一級燙傷，應該唔會有疤痕，不過都嚇鬼死，我個女咁靚，變鍾無艷就慘嘞，佢依家包到成個Lady GaGa咁，今日塊面仲出咗水泡，真係肉痛死，陰功豬！」
雖然醫生建議留院，但Roy和阿Yu寧願接女兒返家親自照顧：「醫生話驚囡囡抓塊面，不過我哋睇政府醫院唔可以陪過夜，怕夜晚姑娘會綁住囡囡隻手唔畀佢抓臉，寧願畀佢出院自己睇住。」前晚阿Yu更擔心到失眠，阿Roy說：「老婆好內疚，我安慰話唔關佢事，冇人想發生意外，以後我哋會小心睇住囡囡。」
採訪：音樂組