陳豪：2年內畀名分Aimee
在陳茵媺（Aimee）的愛情字典裏，陳豪這兩個字解作為專屬筍盤，一旦持有這隻大藍籌，完全可以長揸不放，在陳豪的愛情字典裏亦然，他同樣願意跟Aimee長相廝守。自認是傳統男人的陳豪，明白緣分的降臨是何等奇妙，他要好好給Aimee一個名分，讓兩口子一直走下去。陳豪將為本報一連五日娓娓道出他的事業及愛情路上的起起跌跌。
我唔會比較我以前嘅愛情世界同今日有咩分別，畢竟一段感情，絕對唔可以用簡單幾句說話去分辨對或錯，我只會向前看，過去嘅事，無論事業同愛情，真係過咗去就算，但坦白講我的確比從前快樂，同Aimee一齊好開心。人哋話我係筍盤，實在太抬舉我喇，我只係一個傳統男人，覺得做男人對所有事都應該有承擔，對另一半要好好照顧，畀女朋友一個倚靠同安全感，呢個好緊要，我都有缺點，我仲係學習緊點做一個好男友，因為每個人點都會有犯錯嘅時候，只不過睇下大家點包容對方。
心意兩相通
喺我心目中，Aimee係一個好sweet嘅女仔，對佢第一個感覺好好，加上大家啲興趣幾夾，例如我鍾意研究咖啡，Aimee都好鍾意，呢個係我哋其中一個話題，最重要係大家思想上都幾一樣，有時唔使多解釋，都好似明白對方想點。我哋拍拖未夠一年，但好多人仲心急過我哋，叫我哋快啲結婚，我同Aimee其實已經有共識，希望take it slow，唔好畀壓力對方，希望大家嘅事業做好啲，關係更加好先，我知道呢個名分對女仔好重要，我會努力喇！而我暫時可以畀一個名分佢，因為之前我同朋友喺馬來西亞開嘅咖啡店close咗，我有計劃2年內喺香港開，我想佢做呢間舖嘅老闆娘，呢樣嘢係對佢暫時嘅承諾。
關係「焗緊」
好多人都知我鍾意咖啡，之前我去世界各地拍咗第二輯咖啡特輯《品味咖啡》，其實我更加鍾意自己烘焙咖啡，喺製造過程中學到好多嘢，每一杯好同壞嘅咖啡都係自己製出嚟，就算唔好飲都要自己受番，如果要我用呢個過程形容我同Aimee嘅關係，我第一個畫面就係「焗緊」，哈哈！不過其實我唔會用咖啡嚟形容佢，我整完嘅咖啡永遠唔會保存兩星期，因為會變質，但我對愛情係唔會變嘅！
抗拒演情侶
仲有一樣嘢我哋有共識唔想做嘅，就係情侶檔拍劇，我同佢傾過，大家都唔係咁想，好現實咁講，企喺觀眾角度，都唔想睇一對真情侶演出啦，何況我哋如果喺鏡頭前親熱，我會抗拒囉，所以公還公、私還私，如果將公私擺埋一齊，會好難集中，我自己都會冇信心掌握到嚟演。
口述：陳豪
筆錄：專案組