天明爆粗鬧「情敵」：溝女死遠啲啦！

洪天明與新婚太太周家蔚昨日到無綫電視城錄影《千奇百趣高B班》，兩公婆埋位前站到一旁攬到實，表現冤氣，原來家蔚正在試圖撳熄天明怒火，但最終失敗，天明怒氣沖沖地說：「呢個真係Ｘ街嚟，我要開名講！」

天明說罷即取出手機，展示一個名為Chester Lim的facebook畫面，他怒斥：「呢個人同家蔚拍過拖，不請自來我哋個結婚Party！佢有冇做人情我唔想知，但就冇講句恭喜，嚟到飲飲食食，周圍溝女攞電話，要唔要面架？仲淋到家蔚濕晒，乜人嚟架？溝女死遠啲啦！（點解唔當場處理？）我起初以為係家蔚請佢，後來先知唔係，佢好彩，如果唔係我當場喺佢塊面耍套洪拳！呢個人好想出名，正一Ｘ人。」天明雖將「Ｘ」字調低八度低聲說出，但在旁聽着的森美不禁報以一笑。

洪天明嬲爆爆拿出手機給傳媒展示「情敵」是誰。	周家蔚試圖「獻身」阻擋老公「爆料」。	周家蔚在大前晚的婚禮P上感動落淚，洪天明則恩愛攬實安慰。

難避追訪委屈現身

天明續忿忿不平稱：「本來我唔想講呢件事出嚟，但真係好嬲！我呼籲畀咗電話呢個人嘅朋友，盡量唔好同呢個人接觸，自己小心！（係咪Chester傷害過家蔚？）呢啲係佢哋之前拍拖嘅事，唔使追問，但到我同家蔚拍拖，佢都有煩住家蔚，搞到我好躁！（係咪你介入人哋？）唔關事，我同家蔚都好清楚，係佢唔清楚。」

天明喪鬧Chester期間，家蔚躲到錄影廠外避席，再現身時一臉委屈尷尬，她說：「我同天明講明唔請前度，當晚見到Chester，我都問佢做乜喺度，佢話係我表弟叫佢嚟，期間佢整跌杯水，整濕我件衫，我知佢係唔小心。本來想大事化小，但我尊重老公。（幾時拍拖？）我選完港姐冇耐，表弟介紹下，同Chester拍過半年拖。分手係佢提出，因為我哋辯論，我唔同意，佢就提分手，後來佢要復合我都拒絕。（乜嘢題目咁緊要？）『人喺呢個世界究竟有冇自由呢？』。」

自稱抱歉補送祝福

而被天明指是「X-Man」的Chester昨以電話回應：「我澄清唔係不請自來，係同Janet（家蔚）親友一齊去，亦有畀人情。我講嘢大動作，水濺到Janet，坐中間嗰位朋友可以做證。（天明話你猛溝女？）正常社交，我男女都有傾。總之四年前同Janet分手後，一直係好朋友，若果人哋唔開心，我好抱歉，祝佢哋幸福。」

文：影視組