陳寶珠冇戲癮︰情願做觀眾
陳寶珠與蕭芳芳均是60年代粵語影壇紅透半邊天的女星，雙方氣勢一時無兩。寶珠對這位七公主中排行第四的妹妹，近年為推動公益所付出的心力，尤為敬重。另她指自己無意復出拍電影，做觀眾已相當滿足。
雖然我同芳芳之間嘅影迷，當年間中都會有啲拗撬，但我同芳芳從來冇因為影迷爭執而影響感情，因為我同芳芳都好明白，呢啲影迷只係太過一面倒支持偶像，其實佢哋個個本身都好純，不過，我個心態有時都會覺得有啲攰，我都唔太明白影迷點解要咁樣做？其實支持偶像都可以互相尊重啫！
大談仔女經
後尾到咗1970年，電影市場轉變，我決定息影去讀書，影迷之間都冇再咁多爭拗。直到依家我同芳芳間中都有聯絡，會傾吓閒偈，敍吓舊，傾吓屋企，佢講佢啲女，我講吓我個仔咁，講吓開心嘢，閒話家常咁。
我覺得芳芳近年成立護苗基金好值得欣賞，你話要我幫手推動公益，我係好樂意以身作則，但要我好似芳芳咁成立一個機構，我就力不從心，我知道芳芳花咗好多精神、心機、時間，先至成立到護苗基金，換着我，根本就冇咁嘅精神同魄力，支持到自己去做呢樣嘢。
踏台板滿足
可能我比較少去主動接觸外間，我甚至連復出拍電影都冇興趣，雖則我仍然好鍾意睇戲，但係我都冇戲癮，情願做觀眾好過，況且我都有踏台板，都有做戲噃，我已經好滿足，就算再好嘅電影劇本都唔好搞我，強求係唔會有好結果，何必呢？
文：影視組