GaGa唔係個個啱 樂基兒等緊麥當娜
百變天后Lady GaGa將於五月來港開show，全城掀起撲飛熱潮！除了Lady GaGa外，一班明星又會最想哪一位巨星來港開騷？結果名模樂基兒和汪詩詩不約而同選擇了麥當娜，可見港人十分愛戴娜姐，反而對全城熱爆的GaGa，Angelababy則表示不感興趣，最希望可以重溫天王Michael Jackson的風采。
《首飾發布會》
樂基兒：必睇麥當娜
「想麥當娜嚟，佢未嚟過香港開騷，知道佢開緊騷，但唔係嚟香港，如果佢嚟，我好想去睇。」
諸葛紫岐：天后聲色俱備
「我想王菲嚟香港開演唱會！佢係天后，我好鍾意佢啲造型，把聲又好靚，我去唱K都會唱佢啲歌。」
汪詩詩：至buy百變風格
「我鍾意麥當娜，佢之前開騷我都冇時間去睇，如果佢嚟香港，我一定會去睇！我好欣賞佢嘅百變風格！」
《Rosebullet時裝活動》
蔡穎恩：忠實粉絲勁撐
「想Radiohead嚟，我好欣賞佢嘅音樂，好鍾意聽佢嘅歌，如果佢哋嚟我實去睇！」
江若琳：最愛畢彼特
「想畢彼特嚟，好鍾意睇佢嘅戲，尤其佢做嗰部《史密夫決戰史密妻》，想佢嚟香港開騷，見到佢就得。」
Mandy Lieu：Rock band情意結
「我好想Radiohead嚟香港，中學嗰時已經鍾意佢哋，覺得佢哋好特別，曲風夠Rock，而且每隻碟都係經典，我由細聽到大，所以好有情意結！」
文詠珊：五月睇GaGa
「我知道Lady GaGa五月會嚟，最想見嘅巨星就係佢，好欣賞佢，佢嚟一定會睇。」
《C3日本動玩博覽2012活動》
陳靜：非一般韓男夠特別
「最想韓國組合Big Bang嚟，因為我鍾意當中成員T.O.P.，佢係非一般韓男，好有個人風格好特別。」
《Angelababy生日會》
Angelababy：唔恨睇GaGa
「Michael Jackson，好可惜佢已經唔喺度。另外都想周杰倫嚟開concert，而自己就對Lady GaGa唔太熱情，冇去撲飛。」