黃家諾肉緊 夜攬大隻男
關之琳前男友黃家諾向來不愁女伴，但前晚突然「轉性」與一名同性友人連環哄臉耳語，狀甚親熱，飲大了的余文樂就攬實兩名男友人離開，至於錢國偉就「轉嗒」錢景峰舊愛o靚模Mika，令中環街頭相當精彩。
黃家諾早前被本報拍得與崔建邦緋聞女友混血模Marina.V約會，雖然女方開到口有意思，最終因男方未有表示而告吹。前晚黃家諾出席完活動後夜蒲，約凌晨三時許，發現他與一名大隻男在陰暗處咬耳仔，二人愈講愈肉緊，不避嫌攬到實又面貼面，結果纏繞約二十分鐘，大隻男突然自行離開，黃家諾懶理轉往另一間夜場繼續狂歡，玩至凌晨時分出來，身邊依然不見有女同行。
錢國偉偏愛Mika
與此同時，余文樂亦在夜店盡興步出，步履頗為不穩，可見飲了不少酒，需要兩名男性友人左右扶實，不然肯定醉倒街頭，但樂仔一樣興奮十足，即使要人扶住一步一步行，沿途他也滔滔不絕，更不時傻笑。另外，無綫監製錢國偉就撇甩女友「雜果賓治」陳宛蔚相約郭秀雲兒子舊愛、o靚模Phoebe師妹Mika夜蒲，雖然同行還有另一名o靚模，但明顯錢國偉偏愛Mika，全程照顧有加，完全不擔心女友會吃醋。
文、攝：追蹤組