沈志明衰溝女「遣返」台灣
同人唔同命！同樣由台灣來港發展的沈志明與金剛，前者受緋聞所累被迫「遣返」台灣；後者繼續花花世界，被港女圍得氹氹轉。此外，曾與沈志明發生「不愉快事件」的o靚模謝芷蕙（Cammi），寸爆對方在港「獵女」完畢，不得已才回台繼續「狩獵」！
兩年多前憑「萬寧妹妹」一句「我有少少鍾意咗佢」，帶挈台模沈志明（ZO）成為不少港女心目中的「萬寧哥哥」，更一度成為影壇搶手貨。可惜他先後與周秀娜、趙彤等傳緋聞，花心形象深入民心，再加上與謝芷蕙（Cammi）發生「不愉快事件」，令其形象直插谷底。
緋聞女友句句有骨
雖然待遇及際遇仍勝過不少香港男星，但ZO日前在微博宣布返台灣定居，並於昨晚離港。他透過經理人公司回應，因每次只返家數天被母親詐型，故希望返台灣多陪家人：「唔係放棄香港市場，若有適合嘅戲都會返香港拍，嚟緊打算拍吓台劇。」他直認或多或少因緋聞所累而「遣返」台灣，更曾因傳聞導致心情低落，但強調自己甚少主動結識女性，亦不想靠緋聞做宣傳。
對於ZO告別香港，緋聞女友紛紛割席。韓模蔡恩真表示甚少與他聯絡，亦不知對方返台灣。至於Cammi則句句有骨地說：「應該唔關緋聞事，可能玩厭咗啦！可能喺香港捕獵晒所有獵物，咪返台灣囉！」趙彤亦說：「拍偶像劇都係好嘅選擇，祝福佢！其實緋聞一方面可以提高知名度，但如處理得唔好就會影響形象囉！」
金剛承認冧蔡慧欣
另一邊廂，要「觀眾睇字幕先明講乜」的台星金剛繼續在港「花花世界」，除了遭舊愛唱爆爛滾外，又傳搭上台灣辣妹兼狂追《五覺大戰》的「神獸港姐」蔡慧欣。金剛澄清辣妹是將為人婦的好友，造謠者亦並非舊愛。問到是否有意追求蔡慧欣？他冧爆說：「都OKo架！（有冇趁情人節表白？）我情人節竟然同小儀做嘢，唉！」而蔡慧欣雖然否認金剛追求，但大讚對方搞笑，是自己喜歡的類型。
文：影視組