麥玲玲內地掘金 唔輸畀林峯
徐淑敏（Suki）與老公之姻緣乃麥玲玲撮合，今期Suki請來這位媒人做嘉賓，話題多元化，由投資吸金到維繫婚姻之道都有談及。說到麥玲玲近年「副業」除了拍戲外，亦常返內地為樓盤睇風水，還會出席美容、銀行講座，狂賺「人仔」，受歡迎程度不遜於林峯。
麥：麥玲玲 徐：徐淑敏
遇低潮 衝擊當調整
徐：好多人都知道係你撮合我同我老公嘅姻緣，好想問下，其實你撮合過幾多段姻緣呢？
麥：你係一個好成功嘅例子，我以前初初識我老公，覺得佢幾好，都有介紹女仔畀佢識，之後就同咗佢一齊，能夠撮合到一段姻緣，係一件好開心嘅事，好似我見到你老公Kenny，一直都好鍾意你，最後能夠求仁得仁，同你結婚生小朋友，真係好開心，所以如果我有朋友想搵另一半，我都會幫佢揀一個適合嘅人選。
徐：我都受到你影響，喜歡幫人撮合姻緣，我覺得做呢行嘅女仔，好多時都畀人誤會，想拍拖但又冇好嘅對象，咁啱我先生又有好多單身、好嘅男性朋友，我都會介紹，就嚟成功撮合一段，應該可以結得婚，能夠撮合一段好姻緣，嗰種滿足感好大。今日難得見到師傅，可否指點一下迷津？
麥：當然可以，你條命其實幾好，只係細個時啲運弱少少，廿幾歲之後，就愈嚟愈好，適合做生意，反而唔係太適合做娛樂圈，唔會好似佘詩曼咁大紅大紫，雖然你早結婚，但婚姻穩定性都高，應該蛇年會再生，呢胎會係仔。
徐：其實我仔女都得，不過，今次係仔嘅話，會完美啲！你算命咁叻，究竟當初點入行？
麥：92年我喺律師行做一啲幫人睇買賣合約嘅工作，兼職性質，因為上得嚟律師樓嘅人，好多時都會處於人生十字路口，好似離婚、犯官非咁，我會唔收錢幫佢哋睇相，而當年律師樓嘅工作係萎縮緊，好似我最近買貝沙灣二千幾萬嘅樓，地產佣金多過律師費，地產收廿幾萬佣金，律師樓只係收幾千蚊，所以當年我儲夠客，就轉咗全職做。00年，李丞責因做唔到兩個節目，向電視台介紹，我就去咗有線同林敏驄一齊主持一個賀年搞笑節目，之後，林敏驄前妻陳伶俐介紹我入無綫，跟着就開始幫無綫手，條路都OK，唔算行得太艱難。
徐：有冇遇過事業低潮？
麥：一定有，每個人嘅事業都會升升跌跌，我記得有一次做節目，因為實在太趕同太早，我冇去睇番錄影，當時我將南北掉轉嚟講，就畀人話我唔識用羅庚，仲搞到好大件事，我當然好唔開心，等於有人話醫生唔識用聽筒一樣。不過，轉頭我同農夫傾開，仲同佢哋講不如作番首歌，結果就有《風生水起》呢首歌出現，仲好紅添，我覺得每個人都要有一啲嘢衝擊，令自己作一次重新調整，有時一啲唔好嘅嘢都可以變成好。
徐：有冇為呢件事喊過？
麥：冇，令我學到好多嘢唔使解釋咁多，做好自己就可以，呢件事對我嚟講，反而覺得係賺咗。
演戲減壓 投資有道
徐：近年有嘗試拍電影、做舞台劇，覺得好唔好玩？
麥：好玩，因我好怕悶，當然有啲老行家會覺得點解我做咁多嘢，但我覺得如果做一啲同自己工作好唔同嘅嘢，係一種減壓嚟，同埋人要在群體生活中學習，唔好淨係一個人咁去工作，只聽一啲好嘅嘢，好似之前我做舞台劇，森美叫我唔好講嘢講得太快、對白要講得清楚啲，當時我即刻叮一聲，因為佢提醒咗我，我平時會用幾十秒嚟講完一個生肖，而做舞台劇就唔能夠講得咁快。拍戲亦令我更明白娛圈嘅運作，好似拍港台劇，佢哋會比較慢，五分鐘嘅鏡頭，可以用我兩日時間，因為導演一定要我做到佢嘅要求才收貨，而拍電影，導演黃真真、彭浩翔都教到我嘢，王晶就冇乜點教，因為佢做乜都收貨，但就拍得好快、好有效率。
徐：邊部戲最好玩？
麥：《抱抱俏佳人》，喺戲入面我演腳底按摩師，我特別搵幫我按腳嘅女仔教我應該點做，原本呢部戲，電影公司幫我報咗提名金像獎最佳新演員，但因我之前客串過幾套電影，唔符合資格，否則，我覺得自己都好大機會攞o架！
徐：頭先提到你喺香港置業，你對投資係咪都好有心得？
麥：只可以咁講，我嘅投資時機唔錯，97年前炒樓，97年三月放晒啲樓，沙士之後一年買樓，雷曼事件之前賣樓，依家我除咗香港外，都有喺深圳買別墅，如果我唔係保守嘅話，買幾層樓對我嚟講，難度唔算高，但我係一個好需要安全感嘅人，最多只會hold住兩層樓，因為我要買完樓都仲有一舊錢揸手，咁先覺得安全，就算一年半載唔工作，都唔會有問題。
徐：你係算出嚟，定係對投資方面都有心得？
麥：兩樣都有。
夫妻之道畀老公空間
徐：近年係咪經常返內地掘金？
麥：係呀，我有幫內地地產商睇樓盤風水，好多時周末、周日都會返內地做地產講座，近嘅收幾萬蚊，遠嘅十幾萬一個鐘，都有幾百人嚟聽，仲有一啲美容、銀行講座，之前樂小姐（樂易玲）送咗份聖誕禮物畀我，係一個篋，佢叫我裝晒啲人民幣返嚟，我受歡迎程度不遜於陳豪、林峯o架。
徐：美容講座同玄學有咩關係？
麥：好多人會問脫癦、整容對運程影響嘅問題，我聽過一啲美容公司客戶同我講，我做完講座後，佢哋可以做成幾百萬生意，所以，佢哋好歡迎我上去做講座o架。
徐：你同老公結婚多年都好恩愛，你工作又咁忙，而你哋性格又好唔相似，一快一慢，大家點樣去維繫感情？
麥：我真係冇耐性o架，而我老公就好慢，做嘢會重複又重複，如果問我點維繫，我覺得男人應該畀多啲私人空間佢，我雖然忙，但屋企嘅嘢，會處理得幾好，完全唔需要佢理，就算一盆花，我都會好悉心打理。
徐：果然犀利，我真係要好好學習，好多謝玲玲做我今集嘅嘉賓，希望下次再有機會同你傾過。
文：影視組
攝：李柏儒
場地：台灣一品花雕雞（銅鑼灣）
化妝：Tiffany Fong @ 26 Production
髮型：Eas Fu @ Chin. G