王敏德舌戰索女 怒火街頭
王敏德（Michael）與馬詩慧（Janet）向來是圈中模範夫婦，但前日凌晨Michael卻撇下妻女與一名身材高挑的長髮索女往中環夜蒲，期間二人卻於街頭吵鬧，長髮女向男方連環發炮，Michael安慰女方不果無奈先行離開。Janet坦言老公最近經常夜歸，更不知老公與索女吵鬧。
47歲的王敏德（Michael）與馬詩慧（Janet）將於今年五月便結婚廿周年，二人育有兩女一子，向來也是圈中的模範夫婦，更不時被拍到一家五口外出享天倫樂。不過，前日約凌晨12時，本報發現近年甚少夜蒲的Michael，罕有撇下妻兒與一名長髮索女現身中環蘭桂坊消遣，兩人表現熟落，沿途肩並肩外，還有傾有講，但期間卻突告意見不合，並站於街頭吵鬧，長髮女指手畫腳表現激動，咬牙切齒兼大聲以英語向着Michael連環發炮咆哮，引來不少途人眼望望。Michael見狀即連番安慰，其後女方繼續步往夜店，但等待入場期間卻又再嗌交，一臉無癮的Michael最終先行乘的士離開，女方則步入夜店狂歡。
馬詩慧：唔驚得咁多
本報事後聯絡上Janet，對於丈夫與索女吵鬧一事，她懵然不知：「我唔知喎，咁佢又冇每一次都同我講約咩人出街，不過最近佢忙緊搞自己嘅品牌生意，多咗好多應酬，佢呢排真係成日都夜返咗，唔明點解傾生意要揀夜晚，可能飲多幾杯容易傾啲。」問到會否擔心老公出軌，她說：「唔驚得咁多，大家一齊咁多年，如果每日都驚就好唔得閒，兩個人一齊要互相信任，我對佢有信心。出街唔係同男就同女㗎啦，除非佢哋有好猥褻行為，我先會問佢。」提到Michael外出應酬惹來不少女士埋身，她笑說：「我都有好多男人埋身，你哋唔知啫，邊擔心得咁多。」
文、攝：追蹤組