MC Jin 黃智雯 聯手摘飛躍

劇集《潛行狙擊》Hit爆，造就「立青」MC Jin（歐陽靖）及「阿檬」黃智雯（Mandy）成為飛躍男女藝員的大熱，兩人論情論理亦希望對方得獎，Mandy指MC Jin平時幽默，但一埋位就非常認真，MC Jin則讚對方睇得又演得：「佢好專業又開朗，大家拍得好啱Key！」

馬賽多產競爭大

入行4年的Mandy於07年落選港姐後加入訓練班，至去年獲公司給予多次機會，今年在《潛》劇、《怒火街頭》及《不速之約》都有不俗演出，她表示過往多演乖乖女，《潛》劇的角色則較堅強獨立而獲讚。回想當年以啦啦隊身份幫師兄師姐打氣，曾許願翌年要行頒獎禮紅地氈，可見其野心不淺：「雖然到今年先成真，但都好興奮同期待！（有信心得獎？）今年表現幾好，不過個個候選人機會平等，大家又同期出道，會互相鼓勵。（最大勁敵？）有留意馬賽嘅演出，佢多產之餘亦不斷進步。」Mandy透露將剪短頭髮及曬黑做女警，希望改變形象不想原地踏步。

MC Jin對得獎有十足信心，更睇好拍檔黃智雯。	MC Jin非常感激「Laughing Sir」帶挈。	黃智雯視馬賽為最大勁敵。

無懼與TVB冇約

在美國Rap出名堂的MC Jin是憑《潛》劇及節目主持成功入屋，出街也有市民叫他「立青」，他笑言要多謝貴人「Laughing Sir」！MC Jin知道飾演臥底後曾努力揣摩，希望以不同角度演繹：「開頭我以為十集就死，點知反應幾好，最後做到大結局，仲有份拍電影版，每件事都係意想不到！」對於是提名人中唯一一位非TVB合約藝人，他希望沒有影響，有信心得獎之餘，亦不忘讚每位對手都強勁，故絕非贏硬！

文：影視組