鄭嘉穎：我條命大起大落
鄭嘉穎主演的大陸劇《步步驚心》令他在內地爆紅，身價一登龍門，但誰人沒有遇過低潮？鄭嘉穎當年在台灣發展時，曾經連開飯也沒有錢，要靠阿媽背後支持。經過在台灣的低潮，現北望神州，相信是鄭嘉穎的大起之時。
我條命係大起大落，人生低點都有幾個，哈哈，谷底就當然係去台灣發展。當年喺台灣出完第一集碟，錄緊第二隻唱片就好唔好彩遇上金融風暴，第二隻唱片即刻On Hold。
唱片無大賣
當年身為一個歌手，錄完歌就真係冇其他嘢做，最多都係練吓歌，但係練歌一日都唔練得幾多個鐘，如是者一日過一日、一日過一日，大概過咗半年第二隻唱片都仲未出到。本來每日等待出碟嘅心情當然慢慢冷卻，於是無聊就要搵啲嘢做，買啲烹飪書學煮飯。其實自己煮飯係為咗慳錢，因為之前儲落嘅積蓄都已經使得七七八八，去咗台灣年幾兩年先出第一隻唱片，唱片老實講又唔算大賣，只可以話係OK，嗰陣真係搵唔到錢，當時如果唔搵屋企幫，真係冇錢開飯，當時係要靠屋企支持，靠阿媽先可以繼續做呢行。
簽TVB翻身
困境維持咗年幾，呢年幾可以話係自己人生最Down嘅時候，每日無所事事，去買吓餸、煮吓飯、睇吓書打發時間。直到李國立搵我去拍《絕代雙驕》，由歌手轉做演員，當時都好大掙扎。如果冇《絕代雙驕》後來亦唔會簽到TVB，當時《絕代雙驕》畀亞視買咗，TVB見到我原來會拍電視劇，咁先叫我返來拍劇，之後返TVB到依家發展都算順利。
口述：鄭嘉穎
筆錄：影視組