黎明曳一次：三個月內唔講得
黎明、安志杰及謝婷婷前晚出席首映禮，近日圈中喜訊頻傳，黎明送上「恭喜」，有傳樂基兒造人成功，問他可有「好消息」公布？黎明即發揮「金句王」本色，笑言要「曳一次」拒答，又謂：「有就自然會有，呢分鐘冇！」雖未有公布喜訊，但亦不否定「有喜」的可能性。
電影《鴻門宴》前晚首映，黎明、安志杰和謝婷婷出席，「未來外父」謝賢更捧「女婿」安志杰場。黎明在北京已看過電影，他透露現場有不錯的回響，又說對劇本「一見鍾情」：「作為香港演員，依家已好難得遇到好劇本，都估唔到劇本原來係導演李仁港寫，佢嘅文筆同埋歷史底子好好。」
「有就自然會有」
近日圈中喜事重重，先有劉德華「家中有喜」老婆朱麗倩佗B，後又傳出楊千嬅有孕。早前有傳樂基兒有喜，問黎明何時有「好消息」公布？身為「金句王」的他笑說：「唔好話我又講金句，我真係要套用一句『你哋乖啲啦，唔好問』。（你乖啦，講兩句啦？）首先，中國習俗係三個月內都唔講得，有就自然會有，呢分鐘冇，有就自然會話畀大家知。」
他與樂基兒結婚已有一段時間，有否「生仔大計」？黎明鬼馬的說：「如果我將私人嘢變咗做宣傳焦點就比較難，對我個人嚟講好難乖落去，請容許我曳一次！」
謝婷婷末日先嫁
安志杰拖着女友謝婷婷到場，因他手部受傷，婷婷在訪問時貼心地為男友拿訪問咪，還說：「佢（安志杰）隻手整親呀，係早兩晚洗碗時整到，縫咗七針。」坦言心痛的婷婷更透露廚房滿地是血，狀甚恐怖！對於早前有指Lucas再次逃學，婷婷幫口說：「我諗係假期啦。（打去了解？）唔會啦，如果佢哋出咗埠我都搵佢哋唔到。」當問到二人何時拉埋天窗？他們即相視而笑，婷婷甜笑說：「佢（安志杰）話要等2012年12月21日，睇吓係咪世界末日先呀！」
文：影視組