眾星熱談超能力 Lisa S.怕搭機想識飛

電影中超人、蜘蛛俠和閃電俠，個個身懷絕技，做正義先鋒。平凡人如你，最想擁有哪款超能力？又會想做甚麼？文詠珊、關楚耀希望擁有多啦A夢的法寶「隨意門」，可以四圍去自得其樂；名模Lisa S.就因怕搭飛機而希望識飛，避過沉重心理壓力！

Lisa S.「我想唔使搭飛機就可以去第二度，我好驚搭飛機，長途我會食安眠藥，短途就深呼吸。」

汪詩詩「我想飛，唔想搭飛機，因為我好怕班機會延遲，試過趕機返香港睇囡囡比賽，點知班機延遲，搞到個女好失望。」

楊梓瑤「我想有兩個絕技，一個係『隨意門』，令我返學可以方便啲；另一個就係『記憶麵包』，我就快考試啦，有佢就好！」

文詠珊「想有『隨意門』，想去邊就去邊，可以周圍玩。」

Ana R.「想自己可以掌握天氣變化，咁我就可以控制天氣，我最鍾意秋天，可以着短裙同襯褸。」

余曉彤「我想識飛，可以飛行活動，覺得識飛好方便，天空上空氣又好啲，人又少啲，仲好有型呀！」

馬詩慧「想隱形，可以去好多地方，禁止進入嘅地方我都可以去，最想到主題公園玩到過一晚，唔使返出嚟。」

關楚耀「我最希望識變身，好似『隨意門』咁，鍾意去邊就即刻去到；我最想去埃及，如果有呢個超能力，就唔使坐咁耐飛機長途跋涉先去到。」

廖碧兒「我最希望我的手腳唔會斷，咁我就可以攞好多重嘢又唔怕整親，拍打戲又唔怕整傷。」

詩雅「我最想有跟寵物溝通嘅能力，可以明白寵物嘅想法。因為我屋企有三隻貓三隻狗，其中一隻有分離焦慮症，好怕陌生人，成日會瀨尿，我好想知點解呀！」

童愛玲「我想知道人哋個心諗咩，類似讀心術，因為知道人諗咩，我就可以令每個人都開心。有次囝囝知道要開家長會後，緊張到企喺屋企門口等我同老公返嚟，我問佢點解緊張佢又唔答，嗰時開始我就好想知小朋友個心想點。」