唐貝詩狂讚西裝男 轉玩地下情
和毛玉萍兒子Eric Yu分手的寇鴻萍女兒唐貝詩（Lydia），甩拖不久即被本報拍得和西裝男摸黑蜜遊澳門。Lydia昨日雖否認拍拖，並擺阿媽上枱說被禁踏足情場，但卻不忘狂讚西裝男叻仔！看來Lydia和西裝男的確情非泛泛，吸取之前失敗教訓，有意發展地下情！
昨日Lydia偕同名模諸葛紫岐、林莉、韓模蔡恩真及王友良等出席日本時裝品牌「Snidel & Gelato Pique Tea Party 」2011秋冬時裝展。近日被本報拍得有新歡西裝男的Lydia否認拍拖，並指對方只是替自己網站工作的同事，但卻不忘大讚西裝男：「佢好叻仔，好幫得手！（你對佢印象唔錯？）係呀，我覺得佢叻仔，我公私分明。老闆即係媽咪（寇鴻萍）唔畀我拍拖。（發展地下情囉？）你哋咁想見佢，下個月八日嚟我個event！」
英國相識已六年
自言和西裝男零發展機會的Lydia，說和對方於英國相識至今已約五、六年，更言對方非同性戀。「我鍾意工作認真嘅男仔，依家仲搵緊。唔係所有男仔都係我男友，我咁多男仔朋友，咁我咪好多男朋友？媽咪落咗order唔准我拍拖，因為我分手無耐，依家要專注工作，我唔想分心住。（西裝男係下屬但媽咪想你釣金龜？）唔係，媽咪都鍾意佢，話佢叻仔，不過感情要講feel。」
諸葛婚禮玩神秘
另外，於明年結婚的諸葛早年以諸葛亮後人身份往日本發展令當地人另眼相看，問她婚禮當日會否有日本攝製隊來採訪，諸葛卻表現神秘說：「再講啦！都有人提議過，交由男友去傾啦，但佢向來怕醜同低調。」至於會否投陳法拉視后一票，諸葛說不回應，只說對方和胡杏兒等都做得好。同場的林莉早前被發現和台灣珠寶商韓總在台北酒店蜜會，她說只是傾代言工作，大讚對方細心及投契。
文：名人組