熊黛林野心唔大拒脫模

我自問唔算係一個好大野心嘅人，對於模特兒工作嘅成績，我已經好滿足。好多人問我想唔想去外國行騷？哈哈！其實我試過架！當時入行唔係好耐，我跟國家去過巴黎同紐約行咗幾場騷，個騷好大型，好成功，可以話已經圓咗自己嘅夢想。

攞獎唔敢諗

我見自己喺模界做得差唔多，於是近年開始向電影界發展。直至現時為止，我拍咗幾部戲，我慢慢覺得自己OK。第一部《葉問》，大家畀我嘅評價係我演得唔錯，我知道只係大家對我嘅鼓勵，呢個我明白架！到後來嘅《最強囍事》，入面個角色好玩啲，比較搞笑，其實似番自己，可以畀大家知道我原來係可以咁，其實我個人係好好笑架！喺電影界我只係新人，對我嚟講，我只係希望可以多拍幾部戲，你問我想唔想攞獎？唔係唔想，只係唔敢想，亦冇諗過。

試過拍戲，我發現自己都係鍾意做模特兒，因為自由啲。拍戲要好多時間逗留喺同一個地方，我覺得好辛苦，我鍾意同唔同人合作做唔同嘢。

最欣賞琦琦

其實我去拍戲並唔係覺得模特兒生涯唔長久，而搵定後路，我只係去玩吓、試吓。你睇吓琦琦出道咁耐，依家仲長做長有就知啦！琦琦係我好欣賞嘅模特兒之一，佢平時行騷好有型，着衫又靚，當佢同老公任達華一齊嘅時間又好Sweet，感覺好小鳥伊人，佢將家庭同事業平衡得好好。唔知我將來可唔可以好似佢咁呢？（完）

後記

熊黛林是個可愛的女生，接受訪問時，表情及小動作多多，尤其提到郭富城時更加可愛，她會發揮嬌嗲本色，扮傻巧妙避開話題，但又會忍不住害羞甜笑。雖然她對任何話題都有話直說，但唯獨對感情事總是點到即止，由此可見她對感情的重視及認真。

口述：熊黛林

筆錄：影視組