嘉玲聖誕留港睇實偉仔
劉嘉玲以一身Barbie造型出席聖誕亮燈儀式，她大呻因老公梁朝偉仍未拍完電影《一代宗師》，要好好保養不能受傷，所以今年聖誕不會出埠滑雪，未能度過白色聖誕。她又大讚老公心思細密，經常給她送上難忘又感動的禮物。
劉嘉玲昨晚與國際著名時裝設計師郭培一起為時代廣場進行聖誕亮燈儀式及「Barbie的聖誕派對」主禮開幕。現場展出郭培為Barbie設計的華衣，而嘉玲正穿上其中一款真人版金色透視連身裙出場。她表示之前有看過郭培的作品，讚對方的設計前衞又有東方美，手工精細。郭培就指嘉玲如Barbie般可愛漂亮。
問到嘉玲今年如何慶祝聖誕節，她說：「未知，我嘅時間好彈性，我自己安排。（等老公偉仔？）係，佢呢一年特別忙，連續拍咗三套戲。（出埠過白色聖誕？）佢要好好保養，唔想佢受傷，套《一代宗師》仲未拍完呀，所以唔會去滑雪，會留喺香港靜靜咁過。」
收好多難忘禮物
她指兩人每年聖誕都會交換禮物，覺得趁生日和聖誕這些日子表達心意很浪漫，但她今年送老公的禮物仍未有心水：「要用一年時間好細微去觀察，不過佢成日都唔喺度。（佢送畀你最難忘嘅禮物係咩？）佢好有心思，其實佢嘅心細過我，佢個人比較靜。好多禮物都好難忘，唔係計價錢，係份心意，有時我講一句說話，做一個表情，佢都會記得。（好感動？）係，會諗點解佢會知我需要呢樣嘢？（同偉仔有冇浪漫聖誕？）一定有，我好鍾意聖誕節，因為好近我生日，好有節日氣氛，好開心。」
嘉玲自言很少親手自製禮物給老公，也沒有織過溫暖牌，不過就有下廚煮東西給老公吃，她笑言：「我淨係識煮即食麵同大閘蟹，我呢方面比較弱。（偉仔下廚煮嘢畀你食？）有，佢比較鍾意。（你煮即食麵佢都讚好食？）係，我煮咩佢都話好食。」
文：名人組