C君婚事撻Q：很難走下去
農夫成員C君（鄭詩君）本宣布明年與女友Gloria結婚，可惜感情觸礁。據知兩人婚事撻Q兼甩拖，因女友Gloria性格「黐身」，C君為工作經常冷落佳人，已不只一次為這問題鬧交。至數月前C君與好友細So組創作團隊幫人寫歌搞音樂，再加上與陸永到內地做騷搵銀，令見女友時間如「零」，經過數周冷戰終「分手收場」。
日前C君便在facebook上留言：「這次這段緣分很難走下去，果然……，傷口太深，愈合需時，朋友們交代了，不要再問了，我不知怎樣面對……。」（下圖）字裏行間已暗示分手。昨日記者致電C君問到與Gloria分手一事，C君承認已和平分手。問到是否有第三者？C君謂：「冇啦，只係大家思想同價值觀唔同，成長步伐唔一致，引伸咗好多問題。（心情好差？）好好多，因為工作好忙，都冇時間亂諗嘢。」再見可是朋友？C君無奈說：「依家好難再見，正常朋友都冇時間見，唔會特登約出嚟見。」C君坦言之前有相士老師曾向他贈言，指今年所下的重大決定都不會成事，當時他覺得「人定勝天」，事實卻證明「天意難違」。
麥玲玲早知不妙
好友麥玲玲對C君甩拖表示不知情，她謂：「之前話婚期延遲都心知不妙，唔係潑冷水，有時問題解決唔到就係解決唔到。（幾時再有姻緣？）13、14年會有真姻緣，佢留意吓啲細佢八年嘅女仔啦。」
文：音樂組