熊黛林：我對經理人冇大冇細
現已成為香港一線模特兒的熊黛林（Lynn），成名非僥倖，除靠個人努力外，更加需要一點運氣。Lynn慶幸人生中遇到三位伯樂，很感激經理人Kim全力提攜，與對方亦師亦友，更笑言與對方說話時經常冇大冇細。
現時為止，我嘅模特兒事業發展得唔錯，當中有三個人對我嚟講係好重要。如果冇佢哋，我都唔會做模特兒，亦唔會有今時今日嘅成就。我要喺度借呢個機會同佢哋講聲多謝。正所謂千里馬都要有伯樂賞識，唔係每個人都會遇上自己伯樂，我好幸運遇上三位伯樂。
修讀服裝表演系
第一位伯樂係文老師，佢係發掘我有模特兒潛能嘅人。當時我讀緊高中，預備高考，同同學去巿區買高考材料，就係咁遇上文老師。佢話我身材高挑，好適合做模特兒，當時我先知道原來自己可以做模特兒！我後來跟佢學咗一年行Catwalk，仲成功考入大學嘅服裝表演系。
第二位伯樂係Christine Lau，佢係上海嘅一位Show Director。當年我喺上海行騷，佢對我好好，好欣賞我，幾乎每場騷都會搵我做模特兒，我可以話係佢嘅御用模特兒。佢係第一個建議我去香港做模特兒嘅人，佢話我喺內地發展有限，反而覺得香港人會好鍾意我呢類型，仲係佢介紹依家模特兒公司嘅經理人阿Kim畀我認識。
唔適合寧推job
第三位伯樂當然係阿Kim。佢識得幫我挑選適合我嘅工作。佢好嚴格，唔會隨便幫我接Job，所以我好信賴佢，就算有客搵我做嘢，只要佢覺得我唔適合，多多錢都唔會接，因為佢覺得咁樣做對雙方都冇好處。
我同阿Kim嘅關係可謂亦師亦友，我同佢相處經常冇大冇細。記得我初時嚟香港，人生路不熟，全部都係靠佢幫我。有次我病到死死吓，病咗成個月都唔好，我又唔敢畀佢知，佢又忙我又忙。後來畀佢發現咗，佢即刻帶我睇醫生，仲鬧咗我好耐，我知道佢真係好緊張我。有時有啲報道寫到我好差，佢又會主動打畀我叫我唔使理，但佢反而仲勞氣過我。對我嚟講，我同佢並唔係老闆職員咁簡單，而係更深刻嘅關係。
口述：熊黛林
筆錄：名人組