Kelly養胎唔見4,500萬
走出小產陰霾的陳慧琳（Kelly），再次成功人工受孕，為了小心保護腹中胎兒，大肚婆Kelly推掉近30個登台騷和3部電影，估計損失約4,500萬港元，見財化水。
天后Kelly賺錢能力超強，做了潮媽後為了平衡家庭和事業，以接拍廣告、登台騷講求快靚正，最近才復出拍戲接演賀歲片，再度懷孕的她十分開心，表示不會全面停工：「唔可以話停產，我唔想用停工呢個字，依家主要拍廣告，不過之前都係推咗內地20至30個騷，凡係要坐飛機嘅表演，都唔會考慮。」
老公冇要求停工
問是否老公Alex叮囑要小心，叫她停工休息？Kelly否認說：「冇，反而問過醫生使唔使日日瞓床？醫生叫我放鬆啲，唔好緊張，總之要relax，唔好諗咁多嘢，其實間中出席一、兩個活動都OK，好似今日咁，好過喺屋企亂諗嘢，都係嗰句要relax，醫生都想我郁吓對個胎好。」
據知，Kelly除推掉了約30個大陸登台騷外，還一口氣推了3部電影，貴為天后的她，登台騷價每場100萬，拍電影酬勞500萬，換言之，Kelly為了腹中胎兒，大拿拿將約4,500萬推出門口，她笑說：「唔緊要，冇所謂，生完可以再搵，依家廣告都可以照拍，我手上仲有一個廣告，最緊要簡單舒服，仲會為明年中推出嘅廣東碟錄音，坐喺度錄音唔辛苦，應付有餘，不過電影就一定唔接。」
做瑜伽放鬆心情
Kelly坦言會聽足醫生吩咐，盡量放鬆心情：「醫生話做吓嘢仲好，得閒散吓步，好似平時咁，盡量放鬆，之前第一胎都有做瑜伽，醫生話可以照做運動，唔好日日坐，依家都有做簡單伸展運動，遲啲要做瑜伽。」
文：音樂組