黃百鳴要古仔暗中護駕
Kelly近日忙於趕拍賀歲電影《八星抱喜》，有喜消息傳來，教劇組台前幕後開心不已。而身為該片出品人的黃百鳴早已接獲通知，但卻尊重Kelly對這樁喜訊守口如瓶，只暗中監察Kelly的戲份場口以防萬一，直至電影煞科當日，導演要求演員們抱擁耍樂，製造氣氛，黃百鳴深怕吳君如及甄子丹等不知情下玩得太癲，才被迫爆出「真相」﹕「我捉咗古天樂埋一邊，話Kelly有咗叫佢幫手睇實，唔准人抱起佢拋高囉。」
戲中被安排與Kelly配成一對的古仔，昨晚出席公開活動時表示：「啱啱先知Kelly有咗，佢喺片場完全冇（懷孕）迹象，我哋嘅戲份仲先後去過森林、海邊、地盤添，好彩今次差唔多都係日班戲，冇阻住大肚婆休息。（打算送乜畀佢？）會先問吓佢意見。」另一拍檔杜汶澤聞得Kelly有喜，同樣「不敢置信」﹕「嘩，咁開心？恭喜佢喎。喺片場佢繼續活力充沛、身手敏捷，一啲都睇唔出（有喜），真係好戥佢開心。（搞到你都想做老竇？）我冇咁嘅本事，同老婆日日都冇得見，靠短訊溝通又點嚟有咗呀？」身在內地公幹的甄子丹則透過助手表示恭喜。