熊黛林為幾百蚊無奈透點

記得初入行時，去做北京時裝周嘅模特兒，老實講當地設計師嘅衫好概念化，左一個窿右一個窿，有啲薄到得一層紗，但入面又唔畀打底，其實我真係好唔想着，但我知道如果拒絕，對方一定會換人，為了幾百蚊我惟有頂硬上，依家上網仲可以睇到當時透點嘅相。

當時我去北京做時裝周，因為係新人，所以交通費、食、住都要自己出。（當然如果你係紅星，就會有人包）嗰時為咗慳錢，只有搭火車，去到再面試先知道人哋會唔會用你，有啲模特兒去到連一場騷都無得做，咁就蝕錢喇。當時做一場騷只有一千蚊左右，仲要畀人抽佣，可以袋落袋嘅只有幾百蚊，扣除火車票、食、住，至少做兩場騷以上先有錢賺，所以如果有人肯用我行騷，無論要着咩衫，都一定會着。

熊黛林初做模特兒時，為生活只能乜衫都着上身。	原定留港一星期，結果熊黛林工作多到冇停手。	熊黛林捱足三年，終於搏到每月幾萬收入，但仍未覺自己走紅。

捱足三年 來港即紅

呢種身不由己嘅情況維持咗三年左右，到咗第四年，慢慢開始多工作，有廣告同埋穩定嘅騷，一個月平均有十場騷，同一啲Show Director熟落咗，每次有騷都會搵我，當時每個月都有幾萬蚊收入，已經好唔錯，但係我唔會覺得自己好紅。

真正覺得自己走紅，係有一次嚟香港幫一間美容公司拍豐胸廣告，相信唔少人都會記得嗰輯相，我係以雙手遮胸，出街後反應好好。本來計劃留港一星期，但點知太多工作，多到走唔到，最後一留留咗三個月，之後就無走過，一直喺香港發展到依家。

口述：熊黛林

筆錄：名人組