廖碧兒墨寶矜貴學煮家鄉菜
水有源，樹有根，廖碧兒（Bernice）雖然性格鬼妹仔，但日前與父母、叔伯到家鄉順德尋根祭祖，烹調家鄉菜、造訪廖氏宗祠、參觀當地小學，雖然經歷了事業與感情風高浪急的一年，但Bernice覺得鄉親對她始終不變的支持才最珍貴。
【陳奕龍順德直擊】祖籍順德的Bernice五年前首次還鄉，順德鄉里對出了這樣一位國際華裔小姐、影視明星甚感自豪，五年後，Bernice應now觀星台節目《102觀星總部》邀請再度還鄉，Bernice說：「鄉里仲係keep住咁熱情，好似仲後生咗添，好開心家鄉咁支持我，上次嚟即席寫咗張墨寶，今次返嚟見祠堂裱起晒我啲字同相，又掛起兩塊有我名嘅牌匾，感覺好受重視，『廿三傳孫女碧兒』會拍更多好作品，報答佢哋！」
雙親唔封建
Bernice更挑戰中文與廚藝功力，她說：「師傅教我煮家鄉菜，煎魚柳、煮花膠、整海參，我識煎魚o架，見有少少啡啡（轉色）就反轉煎，我最鍾意食蒸石板（石斑）。頭先參觀小學，見小朋友畫國畫、寫毛筆字、整板畫，好叻，打乒乓波又識spin個波，好犀利！我好似佢哋咁大時，仲玩緊椰菜娃娃！」
廖爸爸見女兒獲鄉親厚愛，他說：「我都好安慰，Bernice份人好直，好多時得罪人，幸好佢低潮時間唔多。（想Bernice下次帶男友返鄉？）感情事交畀佢作主，做父母唔可以咁封建。（介紹男仔佢識？）佢識分析、處理，作為爸爸唔憂心。」