「伊健」私信圈中人 攞女星電話
近月長駐內地拍電影的鄭伊健幾乎絕迹微博，但昨日竟「活躍」私信圈中人，更問杜汶澤攞女星電話，醒目阿澤即識破奸計，但陳小春卻中招，伊健即取笑：「太蠢啦！」
年初在紅館開騷的鄭伊健，最近因專注在內地拍攝電影《忠烈楊家將》，近這個月他幾乎絕迹微博，不過昨日卻突然「活躍」起來，更離奇是他「私信」多位圈中人，索取其他女星電話。其好兄弟陳小春率先中招，事後微博「自首」，更被好友謝天華老婆Tina取笑：「善良的陳，估到你有份！」伊健不齒「黑客」所為，但忍不住取笑小春：「平時傳短訊又唔見佢即刻覆喎，『私信』又咁快，小春今次真係太蠢啦！」
基仔質疑反問
身在內地拍戲的小春昨日電話回應：「我咁啱睇到伊健搵我咁咪覆佢囉，然後我繼續埋位，點知休息再睇微博才知道中計，激死我！（你畀咗咩資料假伊健？）佢問我攞另一個藝人嘅電話，但我冇，所以諗住一陣覆佢，點知原來係騙子。」
至於與伊健在微博互相關注的古巨基昨日受訪坦言亦收到「偽伊健」私信，他說：「對方『Hi』咗一句，我問佢係咪伊健本人，佢就冇再答我！其實我同伊健從來唔會『私信』所以覺得奇怪。」
網站迅速修正
與伊健相識多年的杜汶澤亦收到「伊健」的私信，醒目的他感到不尋常即時踢爆，對方更承認是「黑客」！而伊健本人在微博留言澄清：「各方好友，經過新浪迅速的協助，微博已被修正，並且同時查出盜用本人戶口者是在今天中午12時至1時的期間登入的，如大家在這期間收到我的私信，請不要回覆！」
文：專案組