祖兒又玩又賺High變獅子頭

Joey日前再次以代言人身份為電子及電器連鎖店拍攝新一輯電視廣告，更於尚未開幕的「反斗奇兵大本營」內取景，Joey心情興奮說：「原定拍攝通告係八點，但因為我太心急喇，未到七時已經靜靜雞抵埗。」Joey興奮得周圍與巨型卡通人物影相，包括靈魂人物胡迪。

導演安排於樂園內拍足3日，每日「玩」足12小時的Joey精力十足，更自言是「馬騮精托世」，Joey說：「廣告概念係描述人愛玩嘅本性，玩起嚟童心就自然流露，玩絕對係我強項，玩36個鐘都冇問題啦。」

容祖兒有幸提早與胡迪見面，心情靚爆。

有得玩有錢賺，可謂開正祖兒嗰瓣。

狂玩沖天遙控車

Joey更試玩高27米的沖天遙控車，High爆的Joey下車後只懂傻笑說：「今次真係玩大咗！叫到聲都沙埋，導演仲話我喺半空瘋狂到好似『獅子頭』，我話我其實係獅子頭，老襯底就真，希望大家千祈唔好將片段放上網！」雖然大叫怕怕，但不足一分鐘，Joey又再跳上列車encore，玩夠六次才罷休，認真貪玩。

採訪：音樂組