阿刨20場折子戲沽清無言感激
粵劇班霸雛鳳於12月公演20場折子戲，門票昨日正式開售，不足1小時火速沽清，出現一票難求的空前盛況，主辦單位接到數以百計戲迷的投訴電話，紛紛要求加場甚至加企位，令專程返港演出的龍劍笙（阿刨）感動又開心。
由龍劍笙（阿刨）和梅雪詩（阿嗲）組成的雛鳳鳴劇團，耗資千萬製作的20場折子戲《龍情詩意半世紀》，將於12月1日起假沙田大會堂首演，之後轉到文化中心和演藝學院接着公演。由於雛鳳已有19年沒在香港表演粵劇，內部訂購早已超額，單是雛鳳師傅白雪仙就代好友訂了2500票，故戲迷早於一星期前已在票房擔櫈仔排隊搶飛，情況墟冚。
望增企位
門票終於昨日正式開售，結果於不足1小時火速沽清，一票難求，令數以百計戲迷鼓譟，紛紛致電主辦單位新娛國際投訴，質詢是否扣起大部分門票作內部認購？新娛負責人丘亞葵澄清沒有扣起大部分飛，有50%門票公開發售：「好多戲迷電話投訴話買唔到飛，公司都好遺憾，佢哋要求加場，甚至加企位同電視轉播。」
丘亞葵表示昨日已第一時間將喜訊通知阿刨：「佢好開心，對戲迷50年不離不棄嘅支持無言感激，阿刨答應考慮加場，但要睇場地同體力可唔可以應付。」文：音樂組