Mandy Lieu防狼噴霧抗色魔

名模Mandy Lieu前晚出席於蘭桂坊舉行的萬聖節「生力嘩鬼扮嘢大會」活動。早前蘭桂坊出現色魔，Mandy表示不知情，得知色魔已被捕後，她說：「咁都好啲，呢啲事發生喺女仔身上會好無辜。（有冇試過被跟蹤？）試過有次覺得好似有人跟蹤，好彩就返到屋企，即時跑入屋。（有冇防狼器？）以前興帶防狼噴霧，我朋友送咗支畀我，但有次上飛機唔記得攞出嚟，過關先知唔可以帶上機，即時丟咗，好彩唔係去美國，如果唔係被人拉。」

曾遇鬼怪事

Mandy透露自己一向是玩得之人，她說：「舊年萬聖節有玩鬼屋，之前以為馬來西亞勁啲，估唔到香港冇令人失望，今年都會再去玩。（有冇男仔約去鬼屋追你？）咁又冇，不過建議佢哋之前做定功課，知道邊個位驚。」Mandy又表示萬聖節當日會悉心打扮，但現還未諗到扮演甚麼。

至於有報道指有人與靈體接觸，以致精神錯亂，她說：「睇到都驚驚哋，不過我由細嚇到大，成日聽啲人講去酒店唔想住尾房，唔係咁好。（有冇鬼怪事發生你身上？）都有發生怪事，不過會以科學角度去解釋。我試過畀成班朋友玩，去飲嘢話我隔籬有個人，仲同我講話我隔籬有人講嘢，玩足我兩個鐘，但我冇被嚇倒。」

採訪：名人組