謝文雅回歸香港重新出發

香港歌手謝文雅兩年多前開始往馬來西亞發展，學足當地歌手到處獻唱，累積了不少歌迷，那種到處表演的方式令她相當受用，謝文雅說：「馬來西亞比香港地方大，音樂餐廳又多，好似做巡迴咁，去唔同城市，不停表演，每次可以唱到夠，唔同喺香港，歌手去唱商場騷，最多唱得一、兩首歌，作為一個歌手，喺當地真係好幸福，完全滿足到表演欲。」

將推出廣東歌唱片

雖然在馬來西亞發展不錯，但作為香港人，始終想要有自己的廣東歌作品，謝文雅坦言：「呢兩年間自己嘅改變好大，開始返教會，信仰令我搵到自己，知道自己想要乜嘢，可以畀到啲乜嘢大家睇，成個人都成熟咗好多，所以今次回歸想令大家耳目一新，見到一個新嘅自己。」謝文雅坐言起行，一手包辦起整張唱片的寫歌部分，務求將自己的新思維和大家分享，她說：「返嚟香港嘅感覺好好，將會擁有自己第一張廣東歌唱片，可以唱自己母語嘅歌，10月更加可以參加布道音樂劇，呢啲工作真係好開心。」

文：影視組