黃長興復活笑金剛中文爛
黃長興近期少有在螢幕曝光，連無綫監製也以為他「唔撈」冇預佢，他接受專訪時表示：「啲監製都以為我退出咗娛樂圈，當然唔係。」近期他再度活躍接連開劇，實行重新上路。
前香港先生黃長興早前在螢幕突然「失蹤」，外間以為他借故淡出，他不諱言曾在公司遇上劇集監製也以為他退出了娛樂圈，長興解釋「失蹤」之謎說：「當然唔係退出娛樂圈啦，我好鍾意做戲，上年因為啱啱開法國餐廳，好多時想親力親為去做，時間夾唔到，所以拍劇時間少咗，可能咁樣令人哋有錯覺，依家會放多啲時間去拍劇。」
多謝女友翻譯
重新上路的長興近期再活躍起來，剛完成新劇《4 in love》及將拍攝處境劇，他笑說：「遲啲處境劇日日出街可以畀人知道我仲喺TVB，都期待處境劇開工。」提到剛完成的新劇，長興認為最難是劇本「飛紙仔」：「今次戲份都幾重，『飛紙仔』對我嚟講係好大嘅挑戰，都係拍之前一兩日先收到劇本，可以訓練自己好快掌握劇本。我好多謝女朋友幫我翻譯，依家中文程度都好咗好多。」
辛苦但覺充實
長興既要開劇又要打理餐廳生意，辛苦但覺得相當充實：「因為要通宵拍劇，之後瞓幾個鐘又返餐廳打點，但做自己鍾意嘅嘢都好值得。」自詡中文進步了的他開工時還能取笑他人中文爛，長興笑說：「同金剛合作之後覺得自己廣東話唔錯，都有提佢要咬字清楚啲。」
文：影視組
服裝：Playboy
場地：A La Msison