葉翠翠日日操 跑到索
近期葉翠翠身形愈來愈弗，原來早前拍劇要扮演索女，怕被朋友取笑做「肥翠」，的起心肝減肥，三個月來每日跑步一小時，終於減去近十磅贅肉，由「肥翠」變成「索翠」，更可以大騷美腿。
愛美是女人天性，尤其女藝人，除了為出鏡好看，有時亦是演出角色需要，翠翠早前拍劇扮演索女，為免被朋友笑她「肥翠」，下決心減磅，堅持每日跑步一粒鐘，三個月風雨不改，果然「肥翠」變「瘦翠」。翠翠自覺最明顯是雙腿變得苗條有線條，過往穿短褲提心吊膽的她，近期狂買短褲、短裙大騷美腿，她說：「以前啲牛仔褲都鬆身唔啱着，要買過晒，依家着衫唔窄唔着。」成功減肥後翠翠更請食飯答謝嘲笑她的朋友。
勤運動病痛少
令翠翠持之以恒天天做運動，身體健康也是重要原因，她說：「以前身體好多毛病，鼻敏感、皮膚又有濕疹，抵抗力甚差，有次朋友作病，最後佢竟然冇事，我反而畀佢傳染咗病到死死吓，但係做運動之後情況改善好多，病痛少咗。依家不斷叫身邊朋友做運動，除咗減肥，對身體都有益。」
取經做女強人
此外，翠翠近期忙於拍攝梅小青新劇《當旺爸爸》，扮演女強人，自言不是女強人材料的翠翠事前向OL友人取經，揣摩做女強人的感覺。她說：「我未做過人哋上司，所以都請教吓啲朋友，點樣講嘢、有乜身體語言做出嚟似個硬淨有勢嘅女強人。」另外，翠翠早前又為無綫節目巡禮拍攝明年重頭劇《金枝慾孽2》片段，她希望明年能有機會參演。
採訪：影視組
攝影：攝影組
髮型：Nelson@HAiR
場地：ANA OYSTER & GRILL