袁嘉敏面皮厚主動抓撈
早前初次拍劇的袁嘉敏自認面皮夠厚，為爭取拍劇機會不惜主動搵監製sell自己。雖然事業剛起步，但慳家的她早已儲了一筆私己錢，揚言下年要買四百萬樓做業主！
港姐出身的袁嘉敏（Candy）早前首次拍劇，一拍就拍上癮。她說︰「我梗係想拍劇啦！自己係一個好想試多啲嘢嘅人，要做多啲主持以外嘅工作。」Candy坦承現在經常向無綫監製sell自己，認為機會要自己爭取。她說︰「自己拍劇方面係新丁，我好厚面皮，會自己去敲門搵監製，有機會拍劇對我嚟講係好滿足。」
生日想休息
Candy在無綫短短兩年多，經常出騷及做主持已搵埋唔少。她希望下年能儲夠錢置業。她說︰「想買四百幾萬嘅樓，依家好努力儲緊。因為自己之前租屋住，好似幫個業主供樓咁，而個業主同我差唔多年紀，所以令我有買樓嘅目標。」Candy現時密密做，可算是年終無休，但將生日的她想趁機放假︰「已經好多年生日要做嘢，所以想放假同朋友慶祝，畀自己休息吓。」
問到會否與異性過生日？Candy笑言堪輿學家曾批她今年會結婚︰「佢畀咗個希望我，但自己心態唔係恨結婚。身邊有自己鍾意嘅人，但就算一齊都唔會諗結婚住啦！」
文︰專案組 攝︰秦健輝
場地︰Misto Restaurant