關楚耀餵飽女友當街玩狗
歌手關楚耀（Kelvin）與衞詩（Jill）分手後，兩人感情生活各有着落。Kelvin日前與圈外女友Megan於街頭十指緊扣、兼甜蜜撐枱腳，開餐期間Kelvin主動餵女友吔小籠包，他們還帶埋愛犬同行，「一家三口」姿態晒恩愛。
近日以Man爆留鬚型男形象示人的Kelvin，與拍拖年多的圈外女友Megan打得火熱，雖然他最近為新碟忙個不停，但未有冷落女友，更抽空陪她行街及撐枱腳。
恩愛翹實行街
日前兩口子拍拖歎上海菜，Kelvin負責柯打小籠包及牛肉麵等美食，兩人胃口大好，Kelvin還餵女友食小籠包，逗得對方笑開顏。填飽肚後兩人行街街，沿途糖黐豆十指緊扣，Megan更不時翹實男友，上演甜蜜真人騷。但不時見Kelvin在女友手袋內「喪摷」，原來Megan將愛犬放在名牌手袋內，Kelvin只是摸狗逗玩，十分搞笑；之後Megan抱起狗仔來玩兼讓牠抖氣，而Kelvin亦識做幫女友拎手袋，盡顯男士風度。
作歌送畀女友
兩人路過炒栗子攤檔時，Kelvin又食指大動，買了一大袋熱辣辣的炒栗子，之後Kelvin不斷傾電話而冷落女友，令Megan只好玩狗自娛，狀甚冇癮，不過Kelvin收線後，即發揮冧功，氹得女友笑騎騎。
Kelvin事後表示最近忙為新碟錄音，故趁空閒便陪女友，他又謂Megan沒有埋怨及詐型。談到公開戀情是否輕鬆不少，他笑說：「我有首歌叫《別再躲》，我覺得拍拖唔需要太過掩飾。（作歌畀女友？）都會呀，構思緊。」
文：專案組