婷婷賣口乖讚四哥志杰一樣潮
四哥謝賢出名愛打扮愛潮，就連女兒謝婷婷的男友安志杰也是其粉絲！婷婷昨日自爆謝賢會常叫男友到其家中的衣櫃「購物」，令男友每次都有驚喜，更指兩人身形一樣，擺明大賣口乖，讚父親「老而彌堅」，身形有如後生仔一樣咁fit！
謝婷婷和模特兒汪圓圓昨日出席時裝活動，婷婷表示未有統計每季的置裝費，「但係媽咪叫我係時候計，要儲吓錢。媽咪買衫好節制，所以佢都叫我節制啲，其實我買衫唔算瘋狂，好多朋友比我更加瘋狂。」
她續說平時都會替父親、哥哥及男友置裝。「如果男友想買衫，爸爸會叫男友去佢衣櫃shopping，因為佢哋身形係一模一樣，但係有啲衫太登台feel，男友試完都會有驚喜，如果佢要着白色西裝，爸爸一定有全套。」對於張栢芝和章子怡結怨傳聞，婷婷說冇留意，更言和栢芝冇積怨，平時少聯絡，並說不會因離婚一事而嬲怒對方。
生仔不受哥哥婚變影響
另外，婷婷前晚接受now觀星台訪問，直言掛住一對姪兒，「我好耐冇見佢哋，好掛住佢哋，對上一次見係八月，如果要見，多數係同哥哥媽咪一齊，媽咪好掛住孫仔，見親其他小朋友都會諗起對孫。」婷婷續說雖未到生ＢＢ年紀，但都等緊呢個階段：「做父母責任好大，我性格似媽咪，愛得好投入同犀利。（有否受哥哥離婚影響？）唔會，見到佢對仔咁得意，更加喜歡小朋友。」她續說有和男友討論生Ｂ，對方笑說現在和將來仍是「細路」一名，而雙方父母從冇施壓。
同場，汪圓圓表示剛考完珠寶鑑證試，笑言看珠寶看到眼花，但百看不厭，愈看愈喜歡。
文：名人組