最潮牛女
時裝世界的永恒是一年興足365日，沒有季節之分，所謂的永恒除了黑與白的色調外，就是牛仔（denim）系列，剛巧今期一眾女星在旁大力唱和，所打造的牛仔look不只是牛仔褲那麼單面，還有牛仔背心、牛仔恤衫，以至牛仔晚裝都有齊。而星級形象指導郭慶彬（Ricky）力讚Rihanna牛仔造型吸引，吳君如展現中性型格，謝婷婷充滿潮牛魅力，泳兒就燃起亮點。
泳兒
牛仔晚裝好有心思地計算出嚟，剪裁特別，將佢身形線條拉長，一啲都唔論盡，加上冬菇頭造型，絕對係亮點。
謝婷婷
好有潮牛魅力，牛仔恤衫剪裁闊身，簡單配上短褲，再戴埋黑超兼用上豹紋手袋，輕易地營造出星味。
吳君如
全黑打扮外披牛仔西裝外套，好啱佢中性型格打扮，唔使整色整水已好有型。
鍾嘉欣
好核突，本來打扮尚算合格，奈何梳錯頭，如果轉個直貼長髮，效果更trendy。
樂瞳
長身牛仔裙將佢的骰身形拉長，巧妙咁束起腰belt修正番佢嘅身形比例，好合乎佢青春年紀。
o靚模Hidy
配搭肉酸，短身牛仔背心好似八十年代打扮，花裙再襯斯文高跟鞋，肉酸到痹，仲將佢拜拜肉展現，自暴其短。
蔡少芬
短身cropped denim jacket已經過時，內配黑色不規則背心更加肉酸，最差勁着錯一條吊腳牛仔褲，令粗腿現形，造型師奶。
Rihanna
估唔到上台着咗件牛仔衫都發揮潮爆感覺，露埋條小蠻腰同一對長腿，煞食又吸引；而腰下綴以宮廷style襟針，更能有錦上添花功效。
古天樂
本來牛仔恤衫兼牛仔褲配襯好casual，但佢加咗件黑色西裝，再加埋一副粗框眼鏡，感覺完全唔同，着出咗狂牛力，感覺好型男。
星級形象指導師
星級形象指導郭慶彬（Ricky Kwok）至今為一眾女星裝身扮靚，包括李冰冰、張惠妹與徐若瑄等等。他有自我一套的審美標準，眼光獨到，曾到巴黎時裝周及高級女裝訂造服睇騷包括Chanel、Christian Dior、Valentino以及Jean Paul Gaultier等等。
切忌深淺不一
牛仔竅門係切記唔好上下深淺不一色調放埋一齊，會有上輕下重或下輕上重感覺。如果要着出牛仔味，簡簡單單的T恤皮褸加牛仔打扮絕對係timeless組合，若然轉襯件西裝褸嘅話，穩重又時尚。