笑談甩褲 淡泊獎項 Yumiko 3字頭放得低

事業篇

鄭希怡由入行時的「3T」，搖身一變成為性感舞后，近年她將工作重心轉移內地，又直言「人仔」確好賺。

今年可以話係收成期，去年喺內地拍咗三套劇，已經陸續播映，拍劇確實會多咗人認識自己，連內地比較偏遠地區，觀眾講到我個角色名，已經好開心，會唔會消化唔到？又唔怕喎，內地有咁多電視台。

Yumiko與容祖兒和Twins相當老友。	重提當年的「甩褲」事件，Yumiko笑言夠「驚」典。	放大圖片

紅唔紅　好虛無

講真，依家「人仔」真係OK好賺，但我仲未做到小富婆，同富婆仲有好大段距離，做人唔應該建築喺財產身上，最緊要係開心，喺有限時間做自己要做同應做嘅事。

放大圖片	鄭希怡近年專注返內地拍劇，她表示「人仔」確好賺。	放大圖片

依家條路比入行初期當然闊咗，自己冇原地踏步，已經冇在意任何獎項或者自己喺乜嘢位置，亦冇諗過自己紅定唔紅，因為呢啲嘢好虛無，我依家只會同自己比賽。

放大圖片	Yumiko與吳浩康曾被傳是一對。（資料圖片）

若要講番入行最深刻難忘嘢，甩褲事件確係幾「驚」典，之前試過有內地傳媒仍然追住嚟問，但我已經完全冇嘢，因為學識放低，人始終要向前看，當然意外嘅嘢好難講，千祈唔好再有驚喜畀大家，若然再發生同類事件，我諗我適合過原始生活。

友情篇

Yumiko是圈中數一數二的「義氣仔女」，每逢身邊好友有大事發生，她會兩肋插刀予以慰問，難怪圈中人緣甚佳﹗

我同容祖兒及Twins已經識咗十年，話晒大家差不多同期出道，有種青梅竹馬感覺，大家有乜性格係唔知吖？好多嘢都係心照，有次我同阿Sa（蔡卓妍）講，話將來我哋老咗都不愁寂寞，以我哋嘅友情狀況，將係愈老愈可愛。

傳爭寵　有壓力

入行咁多年，識咗唔少朋友，雖然話同公司會有爭寵或者不和是非，但根本唔係嗰回事囉，每位歌手有佢自己壓力，呢幾年睇到Sherman（鍾舒漫）、泳兒、BOYZ同William（陳偉霆）有進步，好似William，佢可以放低偶像包袱，拍一啲好激好大膽嘅電影，但唱歌同跳舞又好受歡迎；Sherman就係一位心地善良嘅「天使」，我好鍾意佢把聲，令人好舒服；泳兒聲線清脆，係一位好努力嘅女歌手；至於BOYZ呢，雖然平時都有見面，但每次喺台下睇番佢兩個合體演出，有種莫名其妙嘅感動，佢哋係要擺埋一齊嘅﹗

感情篇 嫁唔嫁冇所謂

Yumiko的緋聞不算多姿多采，傳得最盛的除了吳浩康外，便是其緋聞化妝師男友Andy。Yumiko直言「結婚」對她來說，不是特別重要。

以前做藝人，拍拖要收收埋埋，好多嘢唔講得，要做番公司畀我嘅形象，搞到個人好緊張同謹慎，將自己原本真正性格收埋咗，令自己變咗一件Product（商品），不過近幾年大家鍾意睇藝人真性情一面，而唔再係流於偶像表面。

拍得啱　都會嫁

至於結婚嘛，雖然之前講過話唔想結婚，但如果將來有人向我求婚，而嗰個人又係自己鍾意，都會結嘅，但又未至於話好重要，當然見到身邊朋友結婚，都戥佢哋開心，不過我父母又冇向我催婚，佢哋好開通嘅，雖然啱啱踏入「3」字頭，但現時仍然係事業為重，嚟緊希望工作重心能兩邊兼顧到，但應該留喺內地時間會多啲。

後記：齋唱歌　掹掹緊

Yumiko近年專心拍劇，似乎被外界淡忘了歌手身份，當年憑《相對濕度》及《舞吧﹗舞吧》而成為性感舞后的她表示，從沒放棄唱歌：「早排先入錄音室錄音，當時望住支咪，有種Long time no see感覺，原來我冇放棄到，我仲係好鍾意唱歌，只可惜依家唱片市道唔好，若然只係齋做歌手，生活容易掹掹緊。」

採訪：戶冊平 攝影：沈健程 髮型、場地：Ziggie L@Salon La Mod